VOV4.M’nông: Ma rhiăng cán bộ, nai dak si, công an ndrel tahen tâm Rnâng kan rđau nau njrăng, rdâng srê Covid-19 ta Gia Lai hŏ ndal ƀư nau nkah, pă ma rbăn nŭih ƀon lan ta ưbah nkuăl geh srê Nkuăl ƀon têh Hồ Chí Minh, jêh rnôk nkuăl ƀon têh aơ mbơh nau nkhah nŭih. Kan pă nŭih nkhah geh ntơm 2h ôi lơ 31/5. Tĭng nê rmôt kan bah Rnâng kan rđau nau njrăng rdâng srê Covid-19 Gia Lai đă rlau 1.500 nŭih rlau 53 ndeh ndrel 116 nŭih tâm du bôk ndeh mpăr tă bah nkuăl ƀon têh Hồ Chí Minh sĭt nkuăl ƀon têh Pleiku ƀư nau mbơh dak si. Jêh rnôk săch, 667 nŭih geh sŏk mham uănh năl Covid-19, 133 nŭih geh leo hăn nkhah rgum tâm nkuăl Đức Cơ. Ăp nŭih năch êng geh ƀư nkhah tâm ngih, geh nau mêt uănh bah n’gâng kan tâm nkuăl. Êng nau nkân njrăng năch tâm tach ndeh mpăr ntŭk kâp ndeh bah n’gor Gia Lai đă ăp nŭih mbơh nau, nkân njrăng bah trong Camera uănh nau hăn tă bah nkuăl ƀon têh Hồ Chí Minh gay ma njrăng srê. N’gor ndâk 4 ntŭk uănh srê tâm trong quốc lộ 14, 19 ndrel 25 hăn tâm rnôk n’gul măng lơ 31/5, uănh njrăng, pă trong đah ăp ndeh tă bah nkuăl ƀon têh Hồ Chí Minh./.

Nŭih rblang: H’Thi