VOV4.M’nông - Aƀaơ, n’gor Gia Lai geh 16/17 nău nchrăp ƀư dôl dơi ntơm ƀư, đah dĭng lĕ dăng rlău 1200 MW, đah dĭng lĕ rnoh prăk rlău 40 rbăn rmen prăk. Yơn lah, nău ăp nuĭh tơm ntuh kơl “nchoăt rlong” ndâk ƀư gay ơm pơk điện ngăch bah năp nar 31/10/2021 gay geh rnoh prăk kơl an tĭng nău ntrŭnh bah Chính phủ lĕ ƀư mhe ntoh âk nău jêr tâm rnôk ƀư n’hanh dŏng nuĭh pah kan. UBND n’gor Gia Lai an gĭt, n’gor dôl rgum mkra n’hanh ơm mkra lôch ăp nău jêr jŏt.

Tâm rnôk ƀư tĭng ăp nău nchrăp ƀư điện sial ta Gia Lai luh âk nău

                   Tĭng jêh uănh nđôi dŭt khay 4/2021 bah N’gâng kan Công thương Gia Lai, aƀaơ, geh 16/17 nău nchrăp ƀư điện sial ta n’gor dôl ntơm ƀư, yơn âk nuĭh tơm ntuh kơl mô hŏ jêh ăp sam ƀŭt rhăch nău manh neh tĭng nău ntrŭnh Luật neh ntu. Êng, geh du đêt nău nchrăp ƀư ta nkuăl Kông Chro ndâk ƀư du đêt ndơ dŏng ta neh lŏ mir. Wa Nguyễn Duy Lộc, Groi kruanh N’gâng kan Công thương Gia Lai an gĭt, nkô̆ nău lah yor ăp ndơ ƀư gưl 1, mpeh tâm mât uănh bah N’gâng kan Công thương. Rnôk ndâk ƀơ, ăp ntŭk kan knŭng mbơh an n’gâng kan ƀon lan (gưl nkuăl), jêng rnôk uănh nđôi na nê̆ ta dŭt khay 4/2021, nău kan công thương mư dơi gĭt. Đah ăp nău nchrăp ƀư điện sial ta neh mir, N’gâng kan mbra đă ndơ̆ rnoh neh aơ luh nkua; dăng rgum neh tuch tăm. Wa Nguyễn Duy Lộc Groi Kruanh N’gâng kan Công thương Gia Lai an gĭt, ntŭk kan dôl tâm rgop đah ăp nău kan n’hanh nuĭh tơm ntuh kơl nău nchrăp ƀư điện sial nkra rgâl, ƀư sam ƀŭt tĭng nău ntrŭnh.

         “Ăp ntŭk kan nkoch rblang tâm rnôk ntơm ƀư, sam ƀŭt rhăch nău dăn manh neh dôl uănh năl, ăp ngih pah kan dơi kan dôl mĭn njêng. N’gâng kan Công thương dôl tâm ôp tâm nchră uĕh an n’gor nău aơ. Nuih n’hâm tâm ryơk pháp luật, mpôl hên nta nơih an nuĭh ntuh kơl dôh rklaih jêr jŏt ngăch ăp ndoh ndơ tât ntŭk ndâk ƀư, mô geh nău nta nơih ntlơi pháp luật”.

N’gor Gia Lai dôl rgum mkra, dôh rklaih ăp nău mhe ntoh

                   Nău ntoh lư êng ta ăp nău nchrăp ƀư điện sial aƀaơ lah nău dŏng bơi 300 nuĭh pah kan dak bah dih (dŭt âk lah nuĭh Trung Quốc) mô hŏ dơi an. Wa Nguyễn Duy Lộc Groi Chánh văn phòng mât uănh nău kan Văn phòng UBND n’gor Gia Lai an gĭt, lĕ geh sam ƀŭt bah UBND n’gor Gia Lai đă du đêt ntŭk kan rgum mkra rjăp nău aơ. Nuih n’hâm, lah doanh nghiệp mô dơi jêh ƀư sam ƀŭt rhăch nău an nuĭh way kan dak bah dih tĭng nău ntrŭnh, n’gor mbra mprơh ăp nuĭh pah kan mô an:

         “N’gor ntĭm rđău jao ăp ngih pah kan dơi kan uănh nđôi tĭng sam ƀŭt rhăch nău, tĭng nuĭh tâm ăp nar, lah nuĭh way kan mô lah nuĭh pah kan jâng ty gay an ăp nău ntrŭnh rmal tih hành chính đah nuĭh pah kan n’hanh doanh nghiệp dŏng pah kan. Mô tŏng ăp naư dơi an ri mbra mprơh sĭt. Nău kan khlay ta aơ mpeh mât uănh, uănh nđôi sam ƀŭt an pah kan nuĭh pah kan lah N’gâng kan Lao động thương binh n’hanh xã hội, mprơh mô lah mô lah công an n’gor dăn đă. Yơn nău aơ dôl uănh rgum sam ƀŭt rhăch nău jêng ăp ntŭk kan lĕ geh sam ƀŭt dăn njong nar gay mkra”.

                   Nuĭh rblang: Y Sưng Phê Ja