VOV4.M’nông: Đah nau nsôih “Njrăng srê kơt njrăng phung rlăng”, nŭih ƀon lan tâm ăp xã n’har bri tâm n’gor Gia Lai ŭch êng nau tâm ton đah gưl uỷt, n’gâng kan tâm nkuăl ndrel rmôt kan n’hao nau njrăng, rdâng lơh, phong mbơh phung ƀư nau kan tuh-lăp dak tih dôih gay ma njrăng rdâng srê Covid-19 ntưp.

Srê Covid-19 tâm dak he nar lơn ma tât jêr rdâng njrăng, geh tât ăp nŭih ntưp mhe geh kơp dơn đŏng tâm âk nar rlau aơ. Hôm tâm dak tâm dăch ma dak Campuchia, srê ji kŏ dôl ma ntoh luh hô tâm âk n’gor, nkuăl ƀon têh. Ndri ma, âk khay rlau aơ, rmôt tahen n’gor Gia Lai ƀư mât nâp ntŭk kan, ƀư rjăp lơn trong kâng n’har bri gay ma ƀư “bar nau kan”. Mhe aơ, N’gâng kan rđau tahen n’gor Gia Lai hŏ n’hao leo 48 nŭih cán bộ, tahen ƀư nau kan tât tâm nkuăl n’har bri gay ma râng ndrel ma rmôt tahen Biên phòng ƀư nau kan mêt uănh, nkân njrăng, ƀư nâp nau kan lơh rdâng đah phung luh-lăp dak tih dôih, rdâng mô ân srê ntưp lăp nkuăl n’har bri.

Gay rgum n’hâm dăng bah ƀon lan tâm nau kan njrăng-rdâng srê Covid-19 ndrel lơh rdâng nau luh-lăp dak tih dôih, ntơm bôk khay 5 rlau aơ, Rnâng kan n’gor uỷ Gia Lai hŏ geh nau mbơh đă ăp gưl uỷ, n’gâng kan, rmôt kan, ngăn lah ăp xã nkuăl n’har bri nsing tâm nau kan, nau ƀư gay ma tâm rgop đah tahen Biên phònh bonh đă, ƀư ueh nau kan “Lam ƀon lan râng nau njrăng, rdâng srê Covid-19 ndrel luh-lăp dak tih dôih” gay ma njrăng rdâng nau luh lăp tih dôih tâm nkuăl n’har bri. Tâm nchră tât nau kan aơ, Wa Nguyễn Trọng Phú, Kruanh UBND xã Ia Pnôn, nkuăl Đức Cơ mbơh, nau kan nkoch trêng dôl geh ăp xã tâm rgop ngăn gay ma ƀư đah âk nau kan. Xã đă rmôt dân quân ƀư ăp nau mât njrăng tâm ntŭk gay ma ndrel đah cán bộ pôih tahen mêt uănh, nkân njrăng trong n’har. Nkre lah, xã tâm rgop nsum đah rmôt kan bah Pôih tahen n’har bri Ia Pnôn bonh đă ăp rnăk tâm nkuăl ký ton nau kan kơt tĭng ân rjăp nau kan njrăng-rdâng srê ji, mô ân luh-lăp tih dôih, mô lah kơl an, mpôn ân, ƀư ân nŭih luh-lăp tâm trong n’har bri tih dôih, năn mbơh, râng nkoch mbơh phong phung tih dôih…

Wa Nguyễn Trọng Phú- Kruanh UBND xã Ia Pnôn, nkuăl Đức Cơ lah rjăp mpeh nau kơt tĭng nau ntrŭnh đă bah nŭih ƀon lan: Nŭih ƀon lan tâm xã kơt tĭng rjăp ngăn ăp nau ntrŭnh mpeh nau njrăng-rdâng srê. Du đê̆ nŭih sŏk sai, sŏk ur tâm dak Campuchia yơn ntơm rnôk geh srtê ri mô geh hăn khâl. N’ăp ma rnôk tâm ƀonb, tâm rnăk vâl geh nŭih khĭt, kônh wa knŭng kuăl điện thoại ôp khâl, pa ưnau rngot, mô geh hăn ro”.

Tĭng nau kơp bah N’gâng kan rtđau tahen pôih n’har bri n’gor Gia Lai, tât rnôk aơ, tâm 7 xã n’har bri bah n’gor geh 7.762 tâm rnoh 12.024 rnăk ton ƀư rjăp nau kan njrăng, rdâng srê Covid-19 ndrel rdâng nau lăp, luh n’har. Đại uý Nguyễn Viết Hoàn-Chính trị viên, Groi kruanh n’gâng kan rđau tahen n’har bri Ia O, nkuăl Ia Grai, mbơh. Rmôt kan kŏ tâm rgop ma nkuăl bonh đă bơi tât 50% rnoh rnăk tâm xã ký nau ton. Tâm nê, 78 rnăk geh mir êp n’har, n’gâng; 265 rnăk geh băl mpôl tâm dak Campuchia kŏ ký ton. Êng nê, rmôt kan hôm đă cán bộ hăn bonh đă nŭih tơm ndeh rdneg năch, ndoh ndơ, duk mpan râng ký ton ƀư rjăp nau njrăng rdâng srê, mô râng nchuăng rdeng nŭih luh lăp…Jêh rnôk răk kloh ăp nkô̆ nau ndrel ký tâm săm ƀŭt on, wa Rmah Hlên, ta ƀon Bi, xã Ia O, nkuăl Ia Grai mbơh: Srê ji ri jêr ngăn, ri ma kônh wa ân ƀư ân tâm di ăp nau ntrŭnh đă mpeh nau njrăng rdâng srê gay ma mât n’hâm soan ân nơm ndrel ma ăp nŭih êp nê”.

Tâm xã n’har bri Ia Mơr, nkuăl Chư Prông, nau kan nkoch mbơh lŏ geh ntrŭt dăng bah trong nkoch mbơh nau tâm ăp thôn, ƀon kŏ geh tâm ăp ôi, ăp kêng măng đah 30 mnĭt/nar. Rmôt hăn kan bah pôih tahen Ia Mơr hŏ tâm rgop đah ăp n’gâng kan, rmôt kan mât nau nkoch mbơh gay ma nkoch nau đah 2 nau ngơi rnoi Yoăn ndrel Jrai tât ăp ƀon, ăp mir bah ƀon lan. Tâm ăp ntŭk mât njrăng srê, rmôt kan hŏ nkoch trêng, ntĭm mbơh ƀon lan nau kan njrăng srê. Bu ranh Ksor HBâm, ƀon Krông, xã Ia Mơr mbơh: Nau ngơi bah loa ăp nar kŏ nkoch, cán bộ mâp nŭih ri kŏ mbơh. Tât jŏ, jêng mơng tâm nau mĭn, nau kan, ƀư rgâl nau gĭt bah kônh wa. 100% rnăk tâm ƀonb, tâm xã ŭch đăng ký nau ton kơt tĭng rjăp ăp nau ntrŭnh njrăng, rdâng srê, mô ƀư tih, mô mpôn mo, mô kơl an ân ăp nŭih rlet trong n’har. Ăp nŭih ƀon lan kŏ n’hao nuih n’hâm tâm nkah, saơ nŭih mô mơng lăp tâm nkuăl, bol ma moh nau kan ri kŏ mbơh nkre đah rmôt kan n’gâng kan”./.

                        Nŭih rblang: H’Thi