VOV4.Mnông-Ôi nar 26/11, ta ntŭk kan kruanh dak, groi kruanh dak Võ Thị Ánh Xuân rƀŭn nchră Hội đồng mât kơl oh kon se Việt Nam. Bâh bôk năm tât aƀaơ, ntŭk kan mât kơl oh kon se Việt Nam lĕ kơl an rlău 98 rbăn oh kon se đah lĕ rnoh prăk rlău 61 rmen prăk. Tâm nĕ lĕ geh uănh pă ăp ntil nău ji play nuih bâh ndul me, nău tât yor pâl rlưn, nău ji măt an 1 rbăn 200 oh kon se nuĭh rnoi đê̆, oh kon se ta rnăk ach o, dăch ach o nkual yôk. Rnoh prăk kơl an bơi tât 6,9 rmen prăk, đah rlău 20 rbăn oh kon se geh dơn nău kơl. Ngăn lah, yor geh nău khuch tât bâh nuh srê Covid-19, ntŭk kan lĕ kơl an rlău 18 rmen prăk an rlău 14 rbăn oh kon se. Nuĭh geh dơn ndơ kơl lah oh kon se geh nău rêh jêr jŏt mô lah oh kon se ta rnoh rnăk ach o, rnăk dăch ach o, oh kon se lah oh kon bâh nuĭh kan, nuĭh ƀon lan mô geh nău kan n’hanh oh bê mhe deh geh mê̆ ntưp Covid-19. Groi kruanh dak Võ Thị Ánh Xuân ta rơh rƀŭn nchră lĕ kuăl đă ăp nuĭh kan ta hội đồng mât kơl n’hao tay lơn nău kan nơm gay ma rgum lĕ rnoh kơl kan ueh ngăn an oh kon se geh nău rêh jêr jŏt.

Nuĭh rblang: Thị Đoắt