VOV4.M’nông: Kêng măng 12/11, rmôt hăn kan bah N’gâng kan dak si Nguyễn Trường Sơn ƀư tơm hŏ geh nar pah kan đah Rnâng kan rđau nau njrăng, rdâng srê Covid-19 bah n’gor Dak Lak mpeh nau kan rgum, săm nŭih ji. Ntơm lơ 27/4 tât rnôk aơ Dak Lak hŏ kơp dơn geh 2.074 nŭih ji ntưp Covid-19. Tâm nê, geh 1.429 nŭih saơ tâm ƀon lan, geh 68,9% rnoh ji geh saơ. Đah nau kan ndâk ndrel ƀư rgum săm: Lam n’gor hŏ ndâk geh 6 ntŭk săm ân nŭih ntưp srê Covid-19 đah nau dăng 3.222 nsưng bĭch săm tĭng 3 dăp. Bah năp nau tât jêr, n’gor nchrăp mra n’hao ntop rnoh nsưng răm ân nŭih ntưp Covid-19 hao 5.580 nsưng tâm ăp ntrong.

Gay ƀư dơi nau ntrŭt jăng lơi srê Covid-19, ta nar pah kan tâm Dak Lak đă ăp ntŭk kan, n’gâng kan, ngăn lah n’gâng kan dak si kơl an n’gor ndơ dŏng ndrel rgum nŭih tă bah ăp n’gor gay kơl an Dak Lak tâm nau săm srê Covid-19; kơl an ntop vắc xin ân n’gor gay chuh ân ăp nŭih (18 năm hao gŏ lơ), nŭih pah kan tă bah nkuăl geh srê sĭt ndrel kon se ntơm 12-17 năm; kơl an ntuh kơl ndâk, ƀư du ngih dak si ntrơn săm dăp tal 3 gay ma săm ân nŭih ji jâk, lah geh nau âk ir nau rgum, săm ân nŭih ntưp srê Covid-19 bah n’gor./.

Nŭih rblang: H’Thi