VOV4.Mnông- Nar 15/11, groi Thủ tướng rnâng kan chính phủ Phạm Bình Minh lĕ geh tâm mâp ƀon lan ta nkuăl Long Điền n’hanh nkuăl Đất Đỏ n’gor Bà Rịa- Vũng Tàu. Groi Thủ tướng Phạm Bình Minh lĕ mbơh nău tât ƀon lan mpeh rơh rƀŭn nchră tal 2, Quốc hội khóa 15 lĕ geh nău dơi ueh tĭng di bôk nău ngluh mbơh. groi thủ tướng lĕ mbơh tat ƀon lan ăp nău ueh gay ma ndâk nsơm nău wăng sa tâm nău tăch ndơ an dak bah dih n’hanh ntuh kơl hun hao tay. Nkre lah an gĭt chính phủ dôl nsrôih mât đăp mpăn pă Vacxin njrăng Covid-19 ta lam dak, êng ta Bà Rịa-Vũng Tàu geh pă an rlău 1,8 rkeh ding. Lôch geh rơh tâm mâp ƀon lan, ndơn kan an nuĭh leo kan Chính phủ, groi Thủ tướng Phạm bình Minh lĕ tât ôp khâl, rgŏ jă n’hanh pă ndơ an 7 rnăk vâl ntoh lư, geh nău dơi âk tâm nău tât râng ăp rơh rgŏ jă, ăp nău kan tâm rlong rŏng dak n’hanh njrăng, rdâng nuh srê Covid-19 bâh 2 nkuăl Long Điền n’hanh Đất Đỏ. Nkre lah mpôl kan lĕ tât ôp khâl, tâm pă nău rngot klâng n’hanh pă an 25 nklâm ndơ tât ăp rnăk vâl geh nuĭh khĭt ji yorr nuh srê Covid-19.

Nuĭh rblang: Thị Đoắt