VOV4.M’nông: Kêng măng 12/7, hop pơk sŏng dăng đah 12 n'gor nkual Đồng bằng sông Cửu Long mpeh pah kan njrăng n'gang nuh srê Covid-19, Groi Thủ tướng Vũ Đức Đam, Kruanh Ƀan rđău đă gưl neh dak đă ăp n'gor tâm nkual ân lor nchrăp ăp trong rdâng lơh nuh srê âk lơn du đêt, tâm nê ôp uănh tay ăp tŏng lam lĕ rngôch nău dăng uănh năl mham, rnoh âk dak si uănh năl mham, nău dăng uănh năl mham bah rmôt kan dak si, ăp ntŭk săm ji. Ta rơh hop, kruanh rđău kan ăp n'gor (Tiền Giang, Bến Tre, Hậu Giang, Sóc Trăng, Đồng Tháp, Vĩnh Long, Trà Vinh, An Giang, Kiên Giang, Cà Mau, Bạc Liêu, Cần Thơ) mbơh nkrum lam nô nău nuh srê COVID-19 ta nkual. Tĭng nê, rnoh âk nuĭh ntưp đah SARS-CoV-2 geh trong rƀŏng hao âk đah tơm ntưp rêng bah nkual ƀon têh Hồ Chí Minh plơ̆ sĭt. Ăp n'gor ân nkoch kloh du đêt nău jêr jŏt tâm rnôk an ƀư pah kan njrăng n'gang nuh srê. Groi thủ tướng Vũ Đức Đam lah rjăp ân nkoch trêng, kuăl jă nuĭh ƀon lan sĭt bah nkual ƀon têh Hồ chí Minh mbơh ngăch dăng n'hâm suan, nchih săk n'hanh tĭng groi nđôi, uănh năl mham, nsing tâm nău lôch geh uănh năl mham gay geh trong nkra tâm di. Groi Thủ tướng đă nkual ƀon têh Cần Thơ, ntŭk geh nhih nti Đại học Y dược, nhih dak si geh nău dơi săm âk nchrăp nuih n'hâm ntop kơl ăp n'gor tâm nkual. Bộ Y tế đăp mpăn tơm dak si uănh năl mham an ăp n'gor nkual Đồng bằng Sông Cửu Long./.

Nuĭh rblang: Điểu Thân