VOV4.M'nông: Kêng măng ntri (4/6), ta Nhih pah kan Chính phủ, Groi Thủ tướng Vũ Đức Đam, Kruanh Ƀan rđău đă gưl neh dak mpeh njrăng n'gang Covid-19 hop pơk sŏng dăng đah kruanh rđău kan n'gor Bắc Ninh n'hanh Bắc Giang mpeh trong nkra njrăng n'gang nuh srê Covid-19 tâm nô nău aƀaơ. Lah rjăp nău tâm du đêt nkual an gŭ rgum êng, mpă wêl thôn xã bah dih lhăt, tâm trôm lhoi, Groi thủ tướng Vũ Đức Đam dăn đă, ăp n'gor ân rgâl bah lĕ nău hôm geh dja. Bah meng nê, ân mât kân dơi bah ntưp rêng lam ƀon lan, nkre đah nău sŏk ntil mham ta ăp nkual, dŏng ăp ndơ mbơh ngăch dăng n'hâm suan gay ƀoi tĭng. Ăp nar rlău aơ, ma trong uănh năl êng, hŏ năl saơ rlău 500 nuĭh mĭn geh ntưp gay sŏk nham uănh năl. Groi Thủ tướng Vũ Đức Đam mĭn lah, n'gor Bắc Ninh n'hanh Bắc Giang ndơ̆ luh trong nkra tâm pă nuĭh kan n'hanh gŭ sa ta doanh nghiệp, aơ lah trong manh nkra dơm, ân ơm geh trong nkra jŏ jong lơn./.

Nuĭh rblang: Điểu Thân