VOV4.M’nông: Groi Thủ tướng Vũ Đức Đam, Kruanh Ƀan rđău đă gưl neh dak mpeh njrăng n'gang nuh srê Covid-19 mhe hop pơk sŏng dăng đah kruanh rđău kan n'gor Đồng Nai. Lah ta rơh rđău đă rơh hop, Groi Thủ tướng Vũ Đức Đam njrăng đă, Đồng Nai geh nău mha êng kâng dăch đah nkual ƀon têh Hồ Chí Minh, geh rlău n'gul rkeh nuĭh ƀon lan ta nkual công nghiệp, geh ndrâm dak lêng, mâp đah Bình Dương...lah an nuh srê lăp tât mbra "dŭt jêr  jŏt".

Jêng, n'gor ân mât kân lhăt nuĭh luh lăp bah nkual ƀon têh Hồ Chí Minh, Bình Dương tât Đồng Nai n'hanh rlơ̆ tay. Groi Thủ tướng Vũ Đức Đam lah rjăp, mât kân lhăt mô di lah "mpăng lĕ ma trong tăch ndơ", ma ân ntrôl dăng dŏng công nghệ thông tin gay mât kân nuĭh rsong hăn. Nkhêp geh nuh srê ntoh, kruanh rđău kan n'gor Đồng Nai ân tâm ban ŭch rgum glêh ntơm bah bôk năp, ƀư ngăch, đăp mpăn ăp tŏng ndơ dŏng, drăp ndơ gay mpôl kan dak si đăp mpăn, rgum pah kan rdâng lơh nuh srê./.

Nuĭh rblang: Điểu Thân