VOV4.M’nông: Kêng măng 5/5, wa Chu Ngọc Anh, Kruanh UBND nkuăl ƀon têh Hà Nội hŏ hăn uănh nau kan njrăng, rdâng srê ta Ngih dak si Nhiệt đới Trung ương ntŭk tal 2 (nkuăl Đông Anh) jêh rnôk saơ nai dak si bah Ngih dak si ntưp srê Covid-19. Wa Chu Ngọc Anh mbơh, nkuăl ƀon têh tâm ban nau đah N’gâng kan dak si nchueng rdâng lĕ ntŭk ngih dak si tal 2 bah Ngih dak si Nhiệt đới Trung ương. Nau kan bah năp măt lah năch rdâng srê, đăp mpăn ueh ân nai dak si, ăp nŭih dâk bôk njrăng srê. Aơ lah nau gay ma rdâng srê ntưp rêng tâm ƀon lan. Tĭng nŭih dâk bôk n’gâng kan nkuăl ƀon têh Hà Nội, đah nau tât jêr bah srê ji, âk ntil mhe dăng, ăp rmôt nŭih rdâng bôk năp kơt nai dak si, nŭih pah kan tâm ngih dak si hŏ geh nŭih ntưp đah srê Covid-19. Wa Chu Ngọc Anh đă kơp nchih moh săk nŭih luh lăp tâm ngih dak si tâm 10 nar ma aơ gay ma joi, sŏk mham, ngăch rklaih srê./.

Nŭih rblang: H’Thi