VOV4.M’nông: Nar 08/7, Hội đồng Bảo an Liên Hợp Quốc hŏ rgum hop mpeh nô nău Haiti. Nuĭh ntơh măt mha êng bah Tổng Thư ký Liên hợp quốc mpeh Haiti, wa bu ur Hê-len Lai (Helen Meagher La Lime), hŏ mbơh gĭt mpeh nô nău Haiti lôch Tổng thống Jovenel Moise geh pănh nkhĭt hôch ta jay êng 07/7 mhe aơ. Tĭng nê, Haiti hŏ mbơh nô nău jăch ndăn tâm 15 nar n'hanh aƀaơ Thủ tướng Haiti mbra hao mât bôk neh dak an tât rnôk geh du Tổng thống mhe dơi sơch. Nuĭh ntơh măt mha êng bah Tổng Thư ký hŏ nkoch gĭt nău lư n'hanh lah rjăp nău nsrôih bah ăp nhih pah kan Liên hợp quốc ta Haiti tâm nău kơl neh dak n'hanh nuĭh ƀon lan Haiti đăp mpăn nô nău, rlău dơi ăp ntul rlong aƀaơ. Bah năp nê, tâm nar 07/7, Hội đồng Bảo an Liên Hợp Quốc hŏ ndơ̆ luh nău mbơh báo chí nduih lah hô nău nkhĭt hôch Tổng thống Jovenel Moise, tâm pă rngot đah rnăk wâl păng, nuĭh ƀon lan Haiti./.

Nuĭh rblang: Điểu Thân