VOV4.M'nông: Hội đồng Bảo an Liên hợp quốc nar 17/8 hŏ hop n'hanh tâm nchră mpeh ăp nău  nsrôih mhe aơ bah ASEAN geh tât nô nău Myanmar. Lĕ rngôch ăp dak lăp kan nsum Hội đồng bảo an rnê âk da dê nău nsrôih bah ASEAN tâm nău ntrŭt ntrôl joi trong nkra đăp mpăn tâm nkô̆ nău Myanmar, ŭch rŏng đă nuĭh hăn kan bah ASEAN ơm tât Myanmar gay tĭng ƀư nău kan tâm nchră, tâm nê geh nău rdâk njêng nău nsing nơm nuih n'hâm n'hanh buăt nthoi ăp ding geh tât ta Myanmar. Âk dak mpơl tay nău klach rvê mpeh ăp rơh rdôl lơh, tâm lơh tâm su n'hanh kuăl jă ăp ding nkân nkân, dŭt bah tâm lơh tâm su, ƀư tâm nchră nkrum lam n'hanh geh nkô̆ khlay gay nkra nkô̆ nău. Ăp dak ŭch rŏng nuĭh đă hăn kan mha êng bah ASEAN n'hanh nuĭh đă hăn kan mha êng bah Tổng Thư ký Liên hợp quốc kan nsum lhăt, tâm kơl nsum tâm ăp nău nsrôih ntrŭt ntrôl joi trong nkra đăp mpăn an nkô̆ nău Myanmar./.

Nuĭh rblang: Điểu Thân