VOV4.M’nông – Nar 18/6, N’gâng kan ntĭm nti ƀư rƀŭn nchră pơk sŏng dăng lam dak n’glôch jêh 8 năm ƀư tĭng nău rgop an tâm nchră “ndâk njêng kon nuĭh nti nsơm lvang 2012-2020”. Ta rƀŭn nchră, ntoh măt ăp N’gâng kan, nău kan geh tât n’hanh ăp ntŭk lĕ nkoch âk nău blău ơm uĕh, ăp nău jêr tâm mbơh ƀư ăp nkô̆ nău bah bôk nău rgop an tâm nchră, nkre dăn đă ăp trong mkra gay ƀư bôk nău rgop an tâm nchră tâm lvang 2021-2030 săk rnglăy n’hanh ngăn ngên lơn. Bôk nău rgop an tâm nchră “Ndâk njêng kon nuĭh nti nsơm lvang 2012-2020” bôk nău rgop an tâm nchră 4 nău rƀŏng khlay, jêh 8 năm ƀư tĭng, geh 2 nău rƀŏng lĕ jêh lah: Ntĭm nti nuĭh mô gĭt rplay sam ƀŭt n’hanh ntĭm nti tay; n’hanh nău rƀŏng nti nsơm gay jêh nău blău rêh, ndâk njêng nău rêh êng nơm n’hanh nsum mpôl nar lơ uĕh lăng lơn. Jêh 8 năm mbơh ƀư, bôk nău rgop an tâm nchră lĕ geh nău  rgâl tâm nău wât bah ăp ntŭk, bah nĕ lôch jêh trong ntĭm nti bah gưl bah dâng gay ƀư tĭng nău nti lôch naư rêh an ăp nuĭh. Kruanh n’gâng kan ntĭm nti Nguyễn Kim Sơn an gĭt, tâm năm tât, N’gâng kan mbra uănh nđôi gay uănh lah săk rnglăy ntrong kan bah ăp ntŭk ntĭm nti, ntŭk nti nsum mpôl, nâp nâl tĭng nkô̆ nău râng hun hao kon nuĭh nti nsơm.

Nŭih rblang: Y Sưng Phê Ja