VOV4.M'nông: Tâm nău lah ta rơh nkah ndray 30 năm njêng tâm boh tâm dâl nău đah ASEAN n'hanh Trung Quốc dơi ƀư tĭng trong pơk sŏng dăng nar 22/11, Tổng thống Indonesia, Joko Widodo hŏ nkoch ăp trong tâm boh na nê̆ đah bar ding, nkre kuăl jă ASEAN n'hanh Trung Quốc rdâk njêng tay tâm boh ndrel nsĭt nău geh tâm 30 năm tât. Tĭng Tổng thống Joko Widodo, tâm mô hŏ tât 30 năm, nsĭt geh tăch rgâl bar ding hao rlău 82 tơ̆ n'hanh Trung Quốc lah băl tâm boh tăch rgâl dŭt têh bah ASEAN tâm 12 năm aơ. Rgum lĕ ntuh kơl bar ding rlău rnoh 310 rmen đôlar tâm 30 năm, ndơ̆ Trung Quốc jêng tơm ndơ ntuh kơl na nê̆ dak bah dih  (FDI) têh tâl puăn tâm rnoh ăp dak tâm boh bah ASEAN. Kruanh rđău kan Indonesia an lah, tâm boh nâp jŏ đah ASEAN n'hanh Trung Quốc ân geh ăp nău nsrôih lĕ n'hâm suan bah bar ding, gay rdâk njêng nău nsing nơm, rdâk tay nău tâm boh lhăt n'hanh ndrel nsĭt nău geh tâm 30 năm tât./.

Nuĭh rblang: Điểu Thân