VOV4.Mnông- Chính phủ Indonesia n’hanh Pháp lĕ ký nău nchrăp pah kan lvang năm 2022-2027 gay ma ƀư ueh nâp lơn nău tâm boh ntrong kan tâm kơl tâm 5 năm tay. Ntoh ngơi ta lôch rơh lễ ký, kruanh n’gâng kan nchră nău đah dak bah dih Indonesia, Retno Marsudi nkoch mbơh tât du đê̆ nău khlăy an lor tâm nău nchrăp pah kan đah bar ding geh nđâp nău tâm kơl ta ntrong kan dak si, mât rnă njrăng ngih dak, rgâl trôk nar mih sial n’hanh nău mât drăp ndơ tăch rgâl ta dak lêng. Gay ma ntơm ƀư nău nchrăp kan, năm ba kơi, bar ding mbra geh ƀư tâm nchră nău kan ta dak lêng bôk năp. Aƀaơ, Pháp lah dak kan dnrel tăch rgâl têh tal prăm bâh Indonesia ta Châu Âu n’hanh lah dak ntuh kơl châu âu têh tal 2 ta Indonesia. Kruanh n’gâng kan nchră nău đah dak bah dih Pháp an gĭt, nău tơm khlăy bâh tâm kơl lah njrăng rdâng ƀư rlăng tâm ntrong kan mât rnă njrăng ngih dak, chuh n’gang tâm ntrong kan dak si n’hanh năm kan kruanh G20 bâh Indonesia ta năm 2022.

Nuĭh rblang: Thị Đoắt