VOV4. M’nông: Bộ Ngoại giao Iran nar ntri (2/4) an gĭt, Iran n'hanh ăp dak lam ntŭr neh n'glêh an ƀư du rơh hop mpeh tâm ton hạt nhân Iran ta thủ đô Vienna bah Áo tâm nar 6/4 tât. Ăp ndơ nkoch trêng nău lư dak bah dih leo tơm nău Thứ trưởng Ngoại giao Iran Abbas Araqchi nkoch kloh, n'glêh an dơi ndơ̆ luh lôch rơh tâm nchră âk nău tâm lah sŏng dăng n'hanh răp jăp đah Iran n'hanh nuĭh ntơh măt bah Trung Quốc, Nga, Pháp, Đức n'hanh Anh gay tâm nchră nklăp Mỹ mbra plơ̆ tay tâm ton hạt nhân Iran tâm ban kơt ăp trong đăp mpăn tĭng ƀư ăp tŏng n'hanh geh nău tam nău tâm ton dja. Lah ƀư di kơt trong nchrăp ndơ̆ luh, aơ mbra lah rơh hop n'glĕ dŭt đah nuĭh ntơh măt Iran n'hanh ăp dak têh ndrŏng lam ntŭr neh tâm rmôt P5+1, lah Nga, Anh, Pháp, Trung Quốc n'hanh Đức mô kơp Mỹ gay tâm nchră mpeh nău tâm ton hạt nhân Iran, kơp ntơm bah rnôk Mỹ rhuăt luh nău tâm ton dja./.

Nuĭh rblang: Điểu Thân