VOV4.Mnông – Nar Kon se lam ntŭr neh n’hanh lah nar bôk năp bah Khay ƀư an kon se 2021. Bôk nău yor kon se năm aơ lah “ndrel ty đăp mpăn ƀư tĭng nău dơi kon se, mât njrăng kon se geh trôk nar, nuh srê lơh”. Nău ƀư nkô̆ bôk năp tâm khay aơ, nĕ lah Tơm prăk nkrem ntop kơl kon se Việt Nam n’hanh N’gâng kan Lao động-Thương binh n’hanh xã hội ntrŭnh ntop kơl nar sa an rlău 4 rbăn kon se lah F0 n’hanh F1 an nkhah rgum gay njrăng n’gang srê Covid-19. Tĭng nău ntrŭnh aơ, kon se bah oh bê-16 năm deh dôl săm, nkhah êng dak si rgum mbra dơi ntop kơl prăk sa đah rnoh ntop kơl 80.000 prăk du nar du mon tâm 21 nar. Nar kơt dŏng bah nar 27/4 tât nar 31/12/2021. Tơm prăk nkrem ntop kơl kon se Việt Nam kuăl jă ndrel ty, kơl bah ăp rmôt kan, êng nuĭh tâm n’hanh bah dih dak gay kon se Việt Nam rlet rlău lvang aơ, kơl ăp oh geh nău rêh uĕh lăng lơn.

Nuĭh rblang: Y Sưng Phê Ja