VOV4.M'nông: Kon ndăm kađăch Saudi Arabia Mohammed bin Salman nar ntri (25/10) hŏ ntơm geh trong ƀư mhe an nđĭr uĕh Trung Đông rgum ntuh kơl 39 rmen riyals (tâm ban đah 10,4 rmen đôlar) an nău n'hŭch đêt n'huk djơh carbon tâm nkual tâm ban kơt mât njrăng ntŭk gŭ rêh. Kon ndăm kađăch Mohammed bin Salman an gĭt, Saudi Arabia dak tăch n'gluh pring bôk năp lam ntŭr neh, mbra rgop 15% tơm prăk nkrem dja n'hanh mbra pah kan đah ăp dak tâm ban kơt ăp prăk nkrem hun hao êng ƀa ƀă gay kơl n'hanh an ƀư ăp trong kan nđĭr uĕh. Kon ndăm kađăch Saudi Arabia ton dak dja mbra tât n'gluh n'huk djơh mô hôm geh ngăn tâm năm 2060 ta rgum nchră ƀư nđĭr uĕh bah Saudi Arabia. Dak kuel dak lêng dja dôl ƀư nar n'hâm sial bah meng tâm nchră COP26 bah Liên hợp quốc ta Glasgow, Scotland, đah nău mpŏng mbra tâm ban ŭch tât rnoh koh n'hŭch n'huk djơh lam ntŭr neh hŭch jru lơn gay nkra nô nău rŭ hôch lam ntŭr neh./.

Nuĭh rblang: Điểu Thân