VOV4.M’nông: Tâm n’gor Kon Tum nau kan nkoch trêng tât nau săch kan Quốc hội gưl XV ndrel HĐND ăp gưl dôl geh ntrŭt dăng. Rnơm ƀư âk nau kan nkoch trêng ma nŭih ƀon lan nơih gĭt nau mhe, gĭt kloh lơn mpeh nau khlay bah rơh săch kan kŏ kơt lah nau dơi, nau kan bah nơm đah nau kan khlay bah rnoi mpôl.

            Ăp nar ăp tât dĭng lĕ 84 thôn, tổ dân phố bah 11 xã, nkuăl têh bah nkuăl Đăk Hà tâm ăp ntŭk kŏ saơ khuh n’gôr nau kan rƀŏng tât nar lễ têh bah rnoi mpôl, nar săch kan Quốc hội gưl XV ndrel HĐND ăp gưl. Wa Nguyễn Thị Thắm, Kruanh jrâu kan văn hoá-Thông tin nkuăl Đăk Hà mbơh, tâm nau kan nkoch mbơh mpeh nau săch kan tâm rơh aơ, ndrel nau nkoch mbơh kơt ơm ri nkuăl kŏ uănh khlay, ƀư ân ueh nau dăng bah nau nkoch mbơh gay kơl an cử tri ndrel ƀon lan geh âk nau săch lơn tâm nau ndơn nau mhe:

             ‘Phung hên dŏng kơt tĭng ăp nau kan nkoch mbơh nau mhe tâm rnôk ƀư nau nkoch trêng. Nŭih ƀon lan mra dơi geh djăt ăp nau mhe mpeh nau nkoch trêng bah nar săch kan bah điện thoại bah nơm. Phung hên kŏ uănh ngăn tât nau kan nkoch trêng bah trong Zalo, Facebook nê lah ntŭk nkoch mbơh nau mhe bah Đăk Hà, ntŭk nkoch mbơh nau Đăk Hà, Đăk Hà 24h. Nê lah ăp ntŭk nkoch mbơh nau yor ăp ntŭk kan, ăp binh chủng nkoch trêng ngăn geh nkra ndrel mât gay ma ƀư nau kan nkoch trêng tât đah nŭih ƀon lan”.

            Năl nau kan nkoch trêng mpeh nar săch kan lah nau kan chính trị khlay, n’gâng kan ăp jrâu kan, rnâng kan bah nkuăl Đăk Hà mro kơl an ueh ngăn ân nau kan aơ. Wa Phạm Thị Thương, Groi Kruanh Rnâng kan UBND nkuăl Đăk Hà, Groi Kruanh UỶ ban săch kan bah nkuăl mbơh, gay ƀon lan nơih gĭt dơi ăp nau nkoch mbơh, nkuăl ƀư nau nkoch trêng mpeh nau săch kan tât ăp nkô̆, ăp rơh n’hêl ndrel uănh khlay ngăn tât nau kan nkoch mbơh rgum nsum:

             ‘ Nkuăl pơk ăp ntŭk nkoch mbơh nau, nkô̆ mbơh ntoh klơ radio, tivi bah nkuăl. Jêh ri lŏ nkoch mbơh tâm ăp ntŭk nkoch mbơh nau điện tử, ăp trang mạng xã hội ma nkuăl ndâk ƀư. Jêh ri nkoch mbơh tât ăp xã, nkuăl têh ri nau ƀư nkoch mbơh leo n’ăp ma ndeh hăn ndrel trêng leo lao nkoch mbơh nau mô kâp rse mpeh tâm dâng. Nkoch mbơh đah nau kan nchih tâm bảng điện tử, jêh ri Pano, áp phích…Nkre nkuăl kŏ rđau ƀư ân ueh tât ăp cán bộ, công chức, viên chức ndrel ƀon lan gay ma gĭt kloh ăp nau ntrŭnh bah nê ƀư nau dơi ndrel nau săch kan bah nơm ndrel nơm hăn săch nŭih pah kan”.

Rnơm ƀư ueh ăp ntil mpeh nau kan, nkô̆ nau nkoch trêng nơih nkah, nơih rbăng yor ri ma âk cử tri ndrel ƀon lan nkuăl Đăk Hà nơih gĭt mpeh nau săch kan, mpeh nau dơi, nau kan bah nơm tâm nau săch kan. Wa Trần Đình Vân, 72 năm, ngih ta Tổ dân phố 7, nkuăl têh Đăk Hà mbơh, tâm ntŭk păng gŭ ri cử tri ndrel ƀon lan gĭt kloh ngăn nau mpeh nar săch kan.

Ăp nar aơ nŭih ƀon lan dôl ma tâm nchră khuh ngăn mpeh 8 nŭih geh ân săch ntơh măt Quốc hội, 85 nŭih ân săch ntơh măt HĐND n’gor, 58 nŭih geh ntơh măt HĐND nkuăl ndrel ăp nŭih kan tâm HĐND nkuăl têh gay tât lơ 23/5 aơ ntoh nau dơi, nau kan bah nơm bah ăp n’ha phiếu:

  ‘Năm aơ geh nau kan khlay lah săch ntơh măt Quốc hội ndrel HĐND ăp gưl. Phung hên lah nŭih rêh tâm nkuăl aơ ri dŭt n’hâm uănh rjăp ngăn, ndơn đah âk ntrong bu nkoch, kơt lah: tâm Loa ntoh ngơi, tivi, rƀŭn rgum ƀon lan tâm tổ dân phố, rƀŭn chi bộ, rƀŭn bu ranh. Ăp nau kan tâm nchră nê, ăp nar rgum nê kŏ geh nau mbơh nkoch ndrel nkah tât nau săch kan Quốc hội ndrel HĐND ăp gưl, phung hên rnơm lah mra săch luh dơi nŭih geh nau blau nau kan, geh nau ueh, geh bôk rngok ndrel geh nau rnơm đah ƀon lan”./.

Nŭih rblang: H’Thi