VOV4.M’nông – Ta n’gor Kon Tum tâm nar 23/5, geh bơi 347.000 nuih ƀon lan bah n’gor hăn nklăch phiếu săch tâm nar rgum têh bah neh dak gay săch nuĭh gĭt blău. Ntơm ƀưm ƀư săch ta 660 nkual nklăch phiếu tâm n’gor dơi ƀư têh uĕh, dơh, di nău ntrŭnh n’hanh geh mông nar rgum săch lam ƀon lan.

Ƀư tĭng trong kan njrăng n’gang srê Covid-19 lor rnôk lăp ntŭk nklăch phiếu săch

Ta ăp nkual nklăch phiếu geh rmôt dak si pah kan njrăng n’gang srê Covid-19 n’hanh nuĭh ƀon lan tĭng uĕh nău đă bah n’gâng kan dak si. Jêh rnôk ntoh măt an rlău 1.100 nuĭh ƀon lan ƀon Kon Hra Chót, ta nkual săch mrô 6, phường Thống Nhất, nkual ƀon têh Kon Tum n’ha phiếu săch bôk năp tâm thùng phiếu, nuĭh ƀon lan A Huy răm rhơn an gĭt:

“Kônh wa tă aơ 2, 3 nar hôm kônh wa ŭch tât nar săch. Gâp lah bu ranh ƀon ta thôn Kon Hra Chót. Ƀon mpôl hên rhơn săch ăp ăp nuĭh Quốc hội, Hội đồng dơi geh tŏng ăp. Lah nuĭh dơi săch lăp Hội đồng, Quốc hội mpŏng dơi ƀư kơl an nuĭh ƀon lan”.

Du ntŭk săch ta nkual ƀon têh Kon Tum

Tâm Nar săch nuĭh ntoh măt Quốc hội khóa 15 n’hanh nuĭh ntoh măt HĐND ăp gưl, năm kan 2021-2026, n’gor Kon Tum geh 2 rmôt săch ta 2 ntŭk kan săch ntoh măt Quốc hội; 13 rmôt săch ta ăp ntŭk kan săch nuĭh ntoh măt HĐND n’gor; 83 Rmôt săch ntoh măt HĐND gưl nkuăl n’hanh 625 Rmôt săch ntoh măt HĐND xă. Nuĭh ƀon lan n’gor Kon Tum mbra săch, săch 6 nuĭh ntoh măt Quốc hội bah 10 nuĭh dơi săch; săch 50 nuĭh ntoh măt HĐND n’gor bah 85 nuĭh dơi săch; săch 316 nuĭh ntoh măt HĐND nkuăl bah 531 nuĭh dơi săch n’hanh 2.132 nuĭh ntoh măt HĐND xă bah 3.607 nuĭh dơi săch.

Nuĭh rblang: Y Sưng Phê Ja