VOV4.M’nông: Kêng măng 29/7, Rnâng kan rđau nau njrăng, rdâng srê Covid-19 n’gor Kon Tum geh nau mbơh mpeh nau ndâk 2 ntŭk pă xăng mô roh prăk ân ƀon lan nchoh ndeh hon đa tă bah ăp n’gor mpeh ba dâng. Tĭng nê, 2 ntŭk nsrŭng rlu ndrel kơl an xăng tâm n’gor Kon Tum geh pă ƀư tâm 2 trong hăn. Đah trong quốc lộ 14, trong Hồ Chí Minh lah ta Ntŭk tăch xăng mrô 124, km 1475, tâm thôn Dục Nội, xã Đăk Nông, nkuăl Ngọc Hồi. Đah trong quốc lộ 24 lah ntŭk tăch xăng mbrô 118, km 117+237, tâm nkuăl têh Măng Đen, nkuăl Kon Plông.

  Ăp nŭih ƀon lan ncho ndeh hon đă sĭt ƀon tă bah nkuăl geh srê bah ăp n’gor ba dâng, rnôk tât ntŭk nsrŭng rlu aơ, geh kơl ân dơm du ndeh 2 lít xăng ndrel geh dŏng ndơ êng tâm nê. Dơi dĭt, ntŭk tăch pring xăng Kon Tum hŏ ƀư nau kơl an xăng sa ƀon lan tă bah nkuăl geh srê tâm 2 ntŭk aơ ntơm lơ 25/7. Êng lơ 29/7, 2 ntŭk aơ hŏ vơt 850 nŭih ƀon lan ndrel kơl an ân 390 bôk ndeh hăn./.

Nŭih rblang: H’Thi