VOV4.M’nông – Ta n’gor Kon Tum nău kan dak si ta ntŭk dôl tâm rlong đah mông nar gay lôch khay 11 aơ geh nău ŭch lam hvi chuh vaccine Covid-19 an nuĭh rlău 18 năm deh. Ia Chim lah xă nkual njônh bah nkual ƀon têh Kon Tum. Lam xă geh rlău 7.000 nuĭh bah 18 năm deh let lơ đah dŭt âk lah nuĭh rnoi mpôl đêt Jarai n’hanh Bahnar. Ngih dak si xă Ia Chim an gĭt, gay ŭch geh tât lôch khay 11 ntơm jêh nău chuh tŏng nglai vaccine njrăng n’gang Covid-19 an rmôt nuĭh bah 18 năm deh let lơ, ndrel đah tŏng ăp đah ndoh ndơ an trong kan chuh, Ngih dak si hôm tâm rgop rjăp đah n’gâng kan ƀon lan xă ƀư uĕh nău nkoch trêng, rgŏ jă gay nuĭh ƀon lan hăn chuh vaccine.

Kon Tum: geh nău ŭch chuh lam hvi vaccine Covid-19 an nuĭh rlău 18 deh tâm khay 11

Gay ntrôl ngăch chuh vaccine njrăng n’gang Covid-19, nău kan dak si n’gor Kon Tum kơl lor tâm pă nuĭh kan lĕ rngôch mông nar ta 111 ntŭk chuh ta lam n’gor. Bah meng nĕ mât uĕh nău ƀư bah rlău 2.800 rmôt kan ntŭk gŭ rêh nkoch trêng, ntĭm nuĭh ƀon lan hăn chuh vaccine njrăng n’gang kop srê.

Nŭih blang: Y Sưng Phê Ja