VOV4.M’nông: Tâm rnoh bơi tât 357 rbăn cử tri bah n’gor Kon Tum ôi taơ, 23/5 ƀư dơi nau kan bah ƀon lan, nau dơi ƀư tơm bah nơm bah n’ha phiếu săch kan ntoh măt Quốc hội gưl XV ndrel ntơh măt HĐND ăp gưl, năm kan 2021-2026, geh ma rbăn nŭih cử tri lăp quốc tịch. Ăp nŭih aơ bah năp nơh tâm rnoh nŭih gŭ dah rŏng ndrel tâm gŭ ur sai mô geh kết hôn tâm nkuăl n’har bri Việt Nam-Lào geh nglăp quốc tịch Việt Nam tĭng nau nchrăp đah chính phủ 2 dak.

            Bơi tât nar săch kan Quốc hội gưl XV ndrel ntơh măt HĐND ăp gưl năm kan 2021-2026, ur sai nô A Vơi ndrel Y Quên, rnoi Giẻ triêng tâm ƀon Đăk Si, xã Đăk Dục, nkuăl Ngọc Hồi lơn ma rhơn. Ndrel ma nau rep kloh ngih vâl, ur sai nô kŏ leo n’ha cờ neh dak chăng gur gay ma yông bah năp ngih. Yuh Y Quên mbơh, 2 hê ur sai yuh 27 năm da dêh, geh me mbŏ hăn tă bah Lào leo gŭ tâm ƀon Đăk Si rêh ntơm bah kon se.

Năm 2012 đah nau ntĭm mbơh bah n’gâng kan ndrel ntŭk kan tư pháo tâm nkuăl lĕ 2 hê khân păng geh nglăp quốc tịch Việt Nam jêh ri jêng ur sai. Nar săch kan 23/5, bar hê ur sai yuh geh lah rơh tal 2 hăn nklăch phiếu ƀư nau dơi bah ƀon lan, nau dơi ƀon lan ƀư tơm bah nơm saơ dŭt n’hâm rhơn ndrel m’ak ngăn:

             ‘Aơ lah rơh tal bar gâp geh hăn nklăch phiếu săch kan. Ur sai hên rhơn ngăn. Rnôk geh quốc tịch ri ăp nŭih bu hăn săch ma nơm ri knŭng gŭ uănh dơm. Ăp nar rlau aơ Kruanh thôn ndrel cán bộ xã kŏ jur nkoch mbơh ân nơm mpeh luật săch kan, mbơh nŭih ân geh săch ân ur sai hên gĭt. Jêh ri hên kŏ tât ngih bu rƀŭn rgum nsum gay ma bu ranh ƀon mbơh tay nau. Lĕ bar ur sai hên dôl ma ŭch kâp tât nar săch kan ngăn”.

          Ur sai A Vơi ndrel Y Quên uănh nŭih geh săch

  Tâm nar săch kan 23/5 xã n’har bri Đăk Dục, nkuăl Ngọc Hồi, n’gor Kon Tum geh dĭng lĕ 410 cử tri lah nŭih geh lăp quốc tịch Việt Nam ntơm năm 2009 tât năm 2020. Ăp nar aơ rgum tâm 2 ƀon Đăk Si ndrel Đăk Răng. Wa Bloong Keo, du he enŭih tâm ƀon Đăk Si, mbơh, ăp nŭih kônh wa geh nglăp quốc tịch Việt Nam kŏ geh nau rêh đăp mpăn, hăn săch lan lah du nau kan geh kônh wa năl lah nau khlay gay ma ntoh nau kan bah nơm đah neh dak Việt Nam:

             ‘Ê lor lah Đảng, Ngih dak nơm uănh kơl an tât ntŭk gŭ ngao, ntŭk kan bah kônh wa đăp mpăn. Kônh wa rêh ta aơ gơih ngăn. Rnôk tât gŭ ri ngih vâl mô geh ôh, ma rnôk aơ ri nâp ueh hôm. Kônh wa rêh ta aơ ƀư ueh nau kan mât rnă njrăng. Ăp nau ntrŭnh, ntrong kan, nau kơl an bah Đảng, pháp luật bah Ngih dak ri kônh wa kơt tĭng ueh. Kônh wa geh nglăp quốc tịch Việt nam mra ndjôt n’ha phiếu săch kan bah nơm”.

          Nghi wa A Vơi ndrel Y Quên

  Wa Phạm Hải Châu, Groi Bí thư Rnâng kan nkuăl uỷ, Kruanh HĐND nkuăl, Kruanh Uỷ ban săch kan nkuăl Ngọc Hồi, n’gor Kon Tum mbơh, gay kơl cử tri lăp quốc tịch gĭt kloh mpeh nau kan, nau dơi săch kan bah nơm, n’gâng kan ndrel ăp rmôt bah nkuăl ntơm năm 2021 tât rnôk aơ hŏ ƀư ueh nau kan nkoch trêng đah nkô̆ “Tât ăp ngih, mâp ăp nŭih”. Nkuăl kŏ ƀư ueh nau kan nkoch trêng mpeh nau săch kan, tâm nê ngăn ngên uănh kơl cử tri lah nŭih mhe nglăp quốc tịch:

             ‘Nkoch mbơh mpeh nau kan ndrel rmôt cán bộ bah ăp thôn tât ăp rnăk vâl aơ gay ma nkoch mbơh đah nau ngơi bah nkuăl nơm ân kônh wa gĭt mpeh Luật săch kan kŏ kơt lah nau dơi, nau kan bah ƀon lan Việt Nam rnôk hăn săch Quốc hội ndrek HĐND ăp gưl. Bah nau nkoch mbơh ngăn, n’hêl đah rup, nkoch mbơh ân kônh wa gĭt ndrel rhơn ngăn, rnơm tâm nau rđau kan bah Đảng ƀư ân ueh nau dơi bah nơm”./.

Nŭih rblang: H’Thi