VOV4.M’nông: Nar 27/7, n'gor Kon Tum năl geh tay 2 hê nuĭh ntưp đah SARS-CoV-2 n'hao lĕ rngôch rnoh F0 bah n'gor hao 6 nuĭh. Tâm ban kơt 4 nuĭh F0 bah năp nê nơh đŏng, geh 2 hê nuĭh ntưp đah SARS-CoV-2 ta n'gor Kon Tum dơi năl saơ n'hanh an gŭ rgum êng ngăch ta ntŭk nking kâp njrăng nuh srê, mô hŏ năn lăp tâm n'gor Kon Tum. 

 Dơi gĭt 2 hê nuĭh ji dja tâm nar 26/7 ndrel hăn bah n'gor Quảng Nam tât ntŭk nking kâp njrăng nuh srê mbrô 2 ta yôk rse bret trong Hồ Chí Minh, mpeh n'har xã Đăk Man, nkuâl Đăk Glei, n'gor Kon Tum. Lôch uănh năl ngăch năl du hê geh ntưp đah SARS-CoV-2. Nar 27/7, lôch jêh uănh năl mham năl lĕ 2 hê ntưp đah SARS-CoV-2 da dê. Aƀaơ lĕ 2 hê nuĭh dôl an gŭ săm êng ta nhih pah kan tâl 2 nhih dak si Y Dược cổ truyền- Phục hồi chức năng n'gor Kon Tum. Tât aƀaơ n'gor Kon Tum hŏ geh 6 nuĭh ntưp COVID-19, yơn mô hŏ geh nuĭh ntưp bah dih ƀon lan./.

Nuĭh rblang: Điểu Thân