VOV4.M’nông - Ta năp nu nău nkual ƀon têh Hồ Chí Minh khar biăp sa tâm ăp nar tâm nkhah nchăng n’gang srê Covid-19, âk Câu lạc bộ, Đội, Rmôt kơl kan yor nsum mpôl đah hăng rhiăng nuĭh ta n’gor Kon Tum lĕ ƀư rgum biăp sa gay rdêng kơl nuĭh ƀon lan nkual ƀon têh.

                   Bah ôi ơm, yuh Nguyễn Thị Thảo Nguyên, Chủ nhiêm Câu lạc bộ mham duh nkual Kon Tum n’hanh Tây Nguyên lĕ geh măt ta mir biăp ta phường Nguyễn Trãi, nkual ƀon têh Kon Tum. Yuh Nguyên an gĭt tă bah mạng xã hội, gĭt nău ƀư geh nkô̆ bah Câu lạc bộ, tơm mir biăp joi trong ôp kơl Câu lạc bộ 2 mpôr biăp cải. Nău hôm ƀa bă bah ăp nuĭh Câu lạc bộ lah rgum pĕ rdêng sĭt ntŭk rgum n’hanh mât prăp gay biăp rih kah:

         “Biăp di rơh di nar rôk, tŏng ăp biăp an rih, an kloh. Tât ta nĕ ma djơh, hŏnh ri ăp nuĭh mô dơi dŏng an mpŭng dơm, Mpôl oh geh tâm ôp đah ăp Câu lạc bộ ta ăp nkuăl gay ƀư lor wơt dơn ndơ kơl bah ăp nuĭh. Jêh nĕ mpôl oh mbra rgum sĭt du ntŭk ta nkual ƀon têh Kon Tum n’hanh jêh nĕ an tâm ndeh rdêng”.

         Tâm rgop ƀư nău kơl biăp kơl nuĭh ƀon lan nkual ƀon têh Hồ Chí Minh, ăp Câu lạc bộ, Đội, Rmôt kơl kan yor nsum mpôl ta Kon Tum lĕ rgum geh nklăp 10 tấn biăp sa njuăl an nuĭh ƀon lan nkual ƀon têh. Bah meng ăp ntil biăp dŏng dâl, kơt cải, biăp mbĭr, biăp njŭng... hôm geh rpoăl, nông, tuh dơi dŏng jŏ nar. Nău dŭt khlay, dơi ryơk lah nău ƀư kơl biăp an nuĭh ƀon lan nkual ƀon têh Hồ Chí Minh dôl dơi âk nuĭh ƀon lan ta n’gor Kon Tum rƀŏng tât. Yuh Bùi Thị Tuyết Yên, jay ta Tổ 2, phường Nguyễn Trãi, nkual ƀon têh Kon Tum, geh mir biăt njŭng tăch ăp nar an kơl lĕ rngôch mir biăp bah rnăk wâl, an gĭt:

Nuĭh Câu lạc bộ mham duh nkual Kon Tum n’hanh Tây Nguyên rgum biăp

         Ngih way tăm biăp njŭng, dơi koh ndâng âk ri koh jêh nĕ gâp kơl an ăp nuĭh tâm nĕ. Ơm geh ndeh kơt nĕ ăp oh hăn ri gâp kơl an ăp nuĭh ƀon lan ta nĕ. Du mbâr rnôk ji ngot tâm ban du nklâm rnôk hơm”.

         Ndrel đah ƀư rgum biăp bah âk ntŭk ta nkual ƀon têh Kon Tum n’hanh ăp nkuăl, kơt: Đăk Hà, Đăk Tô, Kon Plông... nuĭh Câu lạc bộ mham duh nkual Kon Tum n’hanh Tây Nguyên, Gâp ŭch Kon Tum, Team Kon Tum.... mbra ƀư pă tĭng ntil, mât prăp gay rdêng biăp lăp nkual ƀon têh Hồ Chí Minh. Nô Trần Văn Cao Sang, Kruanh Câu lạc bộ Tôi yêu Kon Tum an gĭt, trong mkra rdêng n’hanh tâm pă biăp tâm rnôk srê Covid-19 lĕ dơi mĭn đăp mpăn biăp tât ty nuĭh ƀon lan nkual ƀon têh ngăch ngăn n’hanh đăp mpăn ngăn:

         “Bôk năp trong mkra manh rdêng hăn. Manh ndeh ri đă an ƀư uănh năl Covid-19. Gâp dơi ôp Câu lạc bộ, Rmôt, mpôl ta Gia Lai khân pơng geh ăp ndeh hăn mô sŏk prăk. Gâp njuăl; gâp rgum tât đah khân pơng. Hôm ntŭk tu bôk ri gâp geh ôp đah thành đoàn nkual ƀon têh Hồ Chí Minh n’hanh ăp Câu lạc bộ, Rmôt mpôl tâm nĕ. Khân pơng nchrăp wơt dơn ndơ bah he gay khân pơng ndơ̆ tât nkual nkhah êng n’hanh ăp nkual dôl geh nchoeng n’gang”.

                   Nuĭh rblang: Y Sưng Phê Ja