VOV4.M’nông: Đah ŭch rŏng ntop kơl nuĭh ƀon lan tâm nkual geh mpă wêl bah ir nău krit jêr, kônh wa ăp rnoi nuĭh ta n'gor Dak Nông hŏ rgum hang rhiăng tấn bum biăp ăp ntil njuăl tât nkual ƀon têh Hồ Chí Minh n'hanh ăp n'gor mpeh bah dâng njrăng, n'gang nuh srê Covid-19.

Nô K’Tư, ta nkual jru ngai Bon Sê Rê A, xã Đắk Som, nkuâl Dak G’Long, n'gor Dak Nông, mô dơn kơl  n lĕ rngôch rnoh prit bah rnăk wâl, ma hôm hăn joi âk ntil bum biăp tâm bri "kah khlay" ta ntŭk he njuăl an kônh wa ăp n'gor mpeh bah dâng dôl geh mpă wêl tă bah nuh srê lơh. Nô K’Tư an gĭt. 

“Gâp hŏ njuăl bar tạ prit n'hanh ăp ntil bum biăp kơt bum prŭm, biăp nse. Ta ntŭk aơ geh ăp ntil biăp nê jêng rnăk hên hŏ lăp tâm bri tôch gay njuăl an nuĭh ƀon lan nkual ƀon têh. Let năp tay, gâp tâm ban kơt ăp rnăk mbra kơl tay ƀơ, ƀăng đŏng. Aƀaơ tât khay bŭt ƀăng jêng geh lĕ ma ƀăng bri, ƀăng tăm, rnăk hên geh tay ăp nklâm ndơ jê̆ gay njuăl tât kônh wa ta nkual ƀon têh".

Tâm ban kơt nê đŏng, ta nkual n'har bri thôn Thuận Hải, xã Thuận Hạnh, nkuâl Dak Song, rnăk nô Trịnh Văn Khởi hŏ kơl rlău 2 tấn biăp play kơt blân ônh, si klôn, prit, ƀơ tât kônh wa nkual nuh srê. Nô hôm rgŏ jă kônh wa thôn ƀon ndơ đêt nuih n'hâm rŏng âk, ăp nuĭh rgop du đêt ndơ tuch tăm nơm geh tăm êng đah nău ŭch rŏng kơl nuĭh ƀon lan nkual nuh srê rlău dơi jêr jŏt.

“Rnăk geh du đêt biăp, play kơt blân ônh, rpuăl prah, rpuăl ngăn, prit, ƀơ ri kơl lĕ đŏng. Tâm bar pe nar aơ saơ nô nău hôm duh jêr bar hê ur sai ndrel tâm nchră an roh đêt nar hăn rgŏ jă kônh wa dôl geh ndơ tuch tăm rlak đêt tâm pă đah kônh wa ta nkual geh nuh srê. Nar aơ gâp n'hanh oh nô hăn rgop prit, play lhŭng, biăp súp lơ bơi 4 tấn gay nchrăp an ndeh rdeng măng aơ hăn njŭn kơl an kônh wa ta nkual ƀon têh Hồ Chí Minh n'hanh Bình Dương”.

Ta xã Dak Buk So, nkuâl n'har bri Tuy Đức, n'gor Dak Nông kônh wa rgop đŏng, rgŏ jă rlău 30 tấn ndơ tuch tăm njuăl tât nuĭh ƀon lan nkual geh nuh srê. Wa Nguyễn Văn Anh, Bí thư Đảng ủy, Kruanh UBND xã Dak Buk So an gĭt:

“Ntŭk lah nkual n'har bri nău rêh kônh wa hôm dŭt âk jêr jŏt. Yơn ma rnôk ăp gưl n'gâng kan, gưl ủy n'gâng kan ta ntŭk rgŏ jă kơl ăp ndơ dŏng sa khlay gay tâm pă jêr jŏt đah nkual geh nuh srê ri dŭt tâm ban ŭch nuih n'hâm. Geh kônh wa rdeng na nê̆ ăp ntil bum biăp tât UBND xã, geh ăp nuĭh an ăp mpôl druh ndăm, bu ur, nông dân hăn lăp na nê̆ tât tâm mir gay rôk klêh, gay tâm pă jêr jŏt".

Bol ma Tây Nguyên dôl tâm rdâng đah nô nău nuh srê Covid-19 tât dŭt krit nji đŏng, yơn đah nău rŏng lĕ nuih n'hâm, "du mbâr rnôk ji ngot dah du nklâm rnôk hơm", kônh wa ăp rnoi nuĭh ta aơ mbra "tâm pă mbâr piăng blah ao" ma ăp ndơ ơm geh "tâm rnăk jay he nơm" kơl nuĭh ƀon lan ta nkual ƀon têh Hồ Chí Minh dôl an gŭ srang ngai êng rlău dơi  nuh srê têh./.

Nuĭh rblang: Điểu Thân