VOV4.M’nông – Ôi 16/11, ta nkual ƀon têh Hồ Chí Minh, Kruanh dak Nguyễn Xuân Phúc ndrel mpôl rmôt ntoh măt Quốc hội nkual ƀon têh Hồ Chí Minh ntŭk kan mrô 10 n’hanh mrô 2 mâp nuĭh ƀon lan nkuăl Củ Chi, Hóc Môn, Quận 1, Quận 3 n’hanh Quận Bình Thạnh tĭng trong ƀư trực tuyến n’hanh pơk sŏng dăng, mbơh an ƀon lan mpeh jêh rơh rƀŭn tal 2, Quốc hội khóa 15. Ta nar mâp, Kruanh dak Nguyễn Xuân Phúc an lah, ăp quận, nkuăl an rblang luh ăp nău ŭch ƀư nsum jêng ăp nău rƀŏng na nê̆ gay ƀư tĭng. Lơn lah nkual ƀon têh Hồ Chí Minh an njrăng nu nău mô uĕh lah ntoh tay rơh srê Covid-19 rơh tal 5 dơi geh. Kruanh dak Nguyễn Xuân Phúc du tơ̆ tay nkoch tâm pă đah ăp nău roh  hô bah Đảng bộ, n’gâng kan n’hanh nuĭh ƀon lan nkual ƀon têh Hồ Chí Minh n’hanh an gĭt, Rnâng kan Ban Bí thư lĕ an ƀư nkah gĭt ƀon lan khĭt n’hanh cán bộ, tahen khĭt tâm rơh srê Covid-19 tâm nar 19/11 tât. Gay rdâk hao wăng sa săk rnglăy, Kruanh dak an lah, nkual ƀon têh Hồ Chí Minh an ƀư du bôk nău kan nkah gĭt bah nkual ƀon têh tâm bôk ndeh ntuh kơl, dŏng, tăch n’gluh. Tâm nĕ rgum ăp ndơ rhŏ an di rơh Tết Nguyên Đán êp tât.

Nŭih blang: Y Sưng Phê Ja