VOV4.M’nông: Kêng măng 29/7, ta nkuăl ƀon têh Hồ Chí Minh, Kruanh dak Nguyễn Xuân Phúc hŏ khâl ngăn Đảng bộ, ƀon lan nkuăl ƀon têh Hồ Chí Minh dôl nsôih njrăng rdâng srê Covid-19, tâm nê geh 2 nkuăl Hóc Môn ndrel Củ Chi. Kruanh dak kŏ bonh đă nŭih ntuh kơl pă ân du nkuăl 5 rmen prăk, 5 máy sŏ n’hâm. Ân lah lah mô ƀư tĭng nau ntrŭnh 16 tâm 2 pơh ma aơ, nkuăl ƀon têh Hồ Chí Minh hôm geh nau khuch yor srê âk lơn, Kruanh dak đă ƀon lan nkuăl ƀon têh ƀư rjăp nau ntrŭnh aơ. Kruanh dak Nguyễn Xuân Phúc đă nkuăl ƀon têh ƀư nuih n’hâm tâm rnglăp, lŏ ndâk nau njrăng rdâng srê Covid-19 tâm nkuăl gay ma hăn tât ăp trong, ăp ngih, joi ăp nŭih, ngăch saơ, nchueng rdâng. Kŏ tâm kêng măng 29/7, ta nkuăl ƀon têh Hồ Chí Minh, Kruanh dak Nguyễn Xuân Pghúc khâl ndrel pah kan đah Công ty cổ phần Công nghệ sinh học Nanogen, rmôt kan dôl ma ƀư rlong vắc xin Na-no-co-vax. Kruanh dak đă N’gâng kan dak si pơk trong nơih ngăn mpeh nau kan ân công ty rlong nkra vắc xin rơh 3, yơn ân geh mât nau kan tâm di, yor geh tât n’hâm soan ƀon lan. Kruanh dak kŏ đă Công ty Na-no-gen mô rlu nkra jêh nau kan, e ẻnka vắc xin ân ueh, n’huch ngăn nau khuch mô ŭch geh tât. Êng nau kơl an tâm dak nơm ri ân geh kơp tât ăp nau kan ngai lơn mpeh nau tăch luh vắc xin./.

Nŭih rblang: H’Thi