VOV4.Mnông- Ôi nar 7/11, kruanh dak Nguyễn Xuân Phúc lĕ tât râng lễ kahgĭt 40 năm nar njêng Giáo hội phật giáo Việt Nam 7/11/1981-7/11/2021 đah bôk nău 40 năm Giáo hội Phật giáo Việt Nam lăp kan ndrel n’hanh hun hao ndrel đah neh dak.

Đại lễ geh ƀư trực tuyến bâh ntŭk tâm mâp Hà Nội tâm rgop đah ăp ntŭk tâm mâp 63 n’gor, nkuăl ƀon têh tâm lam dak. Ntoh ngơi ta rơh lễ, kruanh dak Nguyễn Xuân Phúc ndơn kan an nuĭh leo kan Đảng, ngih dak njoăl nău mbah rhơn ueh tât ăp chư tôn đức giáo phẩm Hòa thượng, Thượng tọa Hội đồng Chứng minh, hội đồng trị sự Trung ương Giáo hội Phật giáo Việt Nam ndrel đah lĕ rngôch tăng ni, phật tử tâm dak n’hanh dak bah dih. Đah nău way ơm ueh phật giáo Việt Nam tâm rlău 2 rbăn năm ba năp, kruanh dak ŭch n’hanh geh nău knơm ta giáo hội phật giáo Việt Nam ndrel đah tăng ni, phật tử lam dak mbra geh mpơl tay nău kan, nău knơm bâh nơm tâm nău n’hao rdâk njêng nău tâm rnglăp lĕ mpôl rnoi, tâm rnglăp ăp phung chroh. Nkre lah, nsum ti tâm rgop gay ma rdâk njêng hun hao văn hóa Việt Nam ueh mhe, geh âk nău ueh êng mpôl rnoi.

Nuĭh rblang: Thị Đoắt