VOV4.M’nông – Tâm rơh hăn khâl dăch dêh na nê̆ dak Lào, ôi 10/8, Kruanh dak Nguyễn Xuân Phúc lĕ geh nău ntoh ngơi khlay ta Quốc hội Lào, dôl ta rơh rƀŭn bôk năp Quốc hội khóa 9. Kruanh dak nkoch nău lap ngăn rnôk lah nuĭh năch dak bah dih bôk năp dơi ntoh ngơi tâm Ngih rƀŭn mhe uĕh aơ bah năp Quốc hội khóa 9 dak Cộng hòa Dân chủ Nhân dân Lào. Ntoh ngơi bah Kruanh dak Nguyễn Xuân Phúc lĕ kơp tay ăp nău têh khlay bah tâm boh 2 dak. Kruanh dak an lah, tâm boh chính trị, geh nău ƀư tơm khlay bah kan ndrel đah Quốc hội 2 dak. Nău kơl bah Quốc hội 2 dak mbra ntŭk nsing nơm pháp lý nâp nâl an nău kan ndrel săk rnglăy bah Chính phủ, Mặt trận Tổ quốc, ăp ntŭk, ăp rmôt kan rêng jêng n’hanh mât nău nsrôih, mĭn ƀư mhe bah doanh nghiệp, nuĭh ƀon lan 2 dak. Lôch nău ngơi, Kruanh dak Nguyễn Xuân Phúc nkoch kloh, 2 dak ndrel ngêt nsum du dak Mekong, ndrel nsing dôn ta dôr yôk Trường Sơn, ntŭk ơm geh bah kăl tât aƀaơ kơt lĕ krêp dêh 2 neh dak, 2 rnoi mpôl. Kruanh dak mĭn lah, nĕ lah krêp dêh mro mrăng, ndrel tâm pă, ndrel hao sâm ndrŏng têh.

 Nu^h rblang: Y Sưng Phê Ja