VOV4.M'nông: Tâm 12 mông nar 26/11 tĭng mông Việt Nam, Kruanh dak Nguyễn Xuân Phúc ndrel i ur leo mpôl ntơh măt gưl têh Việt Nam hŏ jŭt tât tach ndeh păr Geneva, ntơm hăn khâl ngăn dak Thụy Sỹ ntơm bah nar 25 tât nar 29/11. Tâm nar bôk năp hăn khâl ngăn Thụy Sỹ, lôch nău way wơt, Kruanh dak Nguyễn Xuân Phúc rgum nchră đah Tổng thống Thụy Sỹ Guy Parmelin; mâp Kruanh Hội đồng Quốc gia Liên bang Thụy Sỹ; râng rgum nchră doanh nghiệp Việt Nam-Thụy Sỹ. Tâm rnôk hăn khâl, Kruanh dak hăn uănh pâl nkual ƀon têh Bern; khâl n'hanh mâp Kruanh Hội đồng Bang Geneva; wơt kruanh rđău kan tập đoàn têh bah Thụy Sỹ; mâp kônh wa nuĭh Việt Nam gŭ ta dak Thụy Sỹ. Kruanh dak mbra mâp, pah kan đah ăp mpôl kan âk ding đŏng lah Tổng giám đốc Nhih pah kan tăch rgâl lam ntŭr neh (WTO), Tổng giám đốc Nhih pah kan dak si lam ntŭr neh (WHO), Tổng giám đốc Nhih pah kan mât dŏng nău gĭt blău bôk rngok lam ntŭr neh (WIPO) Kruanh liên đoàn bóng đá quốc tế (FIFA).

Nuĭh rblang: Điểu Thân