VOV4.M’nông – Nar 30/7, ta nkual ƀon têh HCM, Kruanh dak Nguyễn Xuân Phúc pah kan đah kruanh n’gâng tơm nkual ƀon têh HCM. Kruanh dak lah rjăp nău rƀŏng lor bôk năp, n’hanh uănh khlay rnôk aơ lah mât njrăng săk soan n’hanh đăp mpăn săk soan bah nuĭh ƀon lan, n’hŭch rnoh nuĭh khĭt. Tĭng nĕ nău kan khlay an ƀư tĭng an dơi trong gŭ tâm srang tĭng Ntĭm đă 16, n’hanh ŭch dơi ƀư tĭng ri an dơi rvê nău rêh bah nuĭh ƀon lan, mô dơi an ƀon lan ji ngot. Đah nkual ƀon têh rlău 10 rkeh nuĭh ƀon lan nkual ƀon têh Hồ Chí Minh, nău nchăng n’gang srê dŭt n’hâm jêr jŏt, Kruanh dak rnê rhơn kruanh rđău, trong kan chính trị nkual ƀon têh HCM lĕ geh âk nău ntrŭnh ngăch, uĕh gay njrăng n’gang chôt srê, ngăch ƀư tĭng ăp nău kơl đăp mpăn nău rêh jêng, ngăch ndâk njêng mhe 16 ngih dak si rdâng săm đah têh hvi, dĭng lĕ hao tât bơi 50 rbăn nsưng ji. Ta nar pah kan, Kruanh dak an gĭt lĕ rgŏ jă ăp nuĭh lŏng bôk tôr tâm n’hanh bah dih dak ntop kơl nkual ƀon têh HCM 103 rmen prăk n’hanh 10 măy nsôr n’hâm n’hanh âk ndơ dak si. Tâm nĕ, doanh nghiệp nău kan ngân hàng ntop kơl 50 rmen prăk, Ngân hàng Sacombank ntop kơl 30 rmen prăk, doanh nghiệp dak bah dih kơl 1 rkeh đôlar.

Nuĭh rblang: Y Sưng Phê Ja