VOV4.M’nông – Kruanh nchră nău Ấn Độ Subrahmanyam Jaishankar nar 14/7 geh rơh rƀŭn ăp ding đah nuĭh tâm ban gưl kan Trung Quốc Vương Nghị bah dih rƀŭn nchră bah Hội đồng Kruanh nchră nău, Rmôt kan nsum Thượng Hải (SCO) ƀư ta Tajikistan. Aơ lah rơh tal 2 kruanh nchră nău Ấn Độ n’hanh Trung Quốc mâp măt kơp bah rnôk tâm pit ta n’har bri 2 dak geh rnôk khay 5/2020, ntrôl tâm boh ăp ding jur hŭch đêt ngăn bah sa ơm tât aƀaơ. Nău tâm boh ăp ding Ấn Độ-Trung Quốc lĕ jur mô uĕh hô ngăn rlău 1 năm bah năp geh tât nău tâm pit ta n’har bri. Jêh âk rwăch tâm nchră n’hanh mât njrăng bri dak Ấn Độ n’hanh Trung Quốc lĕ tâm ban ŭch rhoăt tahen n’hanh drăk nsiu ăp ntŭk tâm pit ta n’glău Pangong, Đông La-đác tâm khay 2 năm aơ. 2 dak tâm ban ŭch tâm rgâl ntrôl mkra ăp nău hôm ƀa ƀă dơi 2 ding dơn ŭch.

Nuĭh rblang: Y Sưng Phê Ja