VOV4.M’nông – Dơn nău jă bah Đại tướng Phan Văn Giang, Kruanh N’gâng kan mât njrăng bri dak he, Mpôl ntoh măt tahen gưl prêh Liên hiệp dak Anh n’hanh Bắc Ai-len yor wa Robert Ben Lobban Wallace, Kruanh n’gâng kan mât njrăng bri dak ƀư kruanh mpôl hăn khâl Việt Nam bah nar 21-23/7/2021. Ôi 22/7, ta Ngih N’gâng kan mât njrăng bri dak, Đại tướng Phan Văn Giang, Ủy viên Bộ chính trị, Groi Bí thư Quân ủy Trung ương, Kruanh N’gâng kan Mât njrăng bri dak ƀư tơm wơt n’hanh rgum nchră đah wa Robert Ben Lobban Wallace ndrel ăp nuĭh tâm rmôt.

Ƀư wơt Kruanh n’gâng kan mât njrăng bri dak Liên hiệp dak Anh n’hanh Bắc Ai-len Robert Ben Lobban Wallace

Ta nar rgum nchră, Kruanh N’gâng kan mât njrăng bri dak Liên hiệp dak Anh n’hanh Bắc Ai-len nkoch nău mĭn êng bah Việt Nam tâm nău mkra nu nău biển Đông, mĭn lah nău khlay bah dah ŭch trong dak lêng, trong trôk, kơl ryơk pháp luật, lah rjăp ăp nău tâm rkeh an dơi mkra đah trong đăp mpăn, nsing tâm luật pháp lam ntŭr neh. Tâm ban ŭch uănh lah, năm bah năp tâm boh kan ndrel đah 2 dak lĕ dơi hao du gâl prêh mhe, đah âk nău geh ta ăp nău kan chính trị, wăng sa, tăch rgâl, văn hóa, ntĭm nti.

Nuĭh rblang: Y Sưng Phê Ja