VOV4.Mnông-Ntŭk kan kruanh n’gâng kan nchră nău đah dak bah dih Hàn Quốc an gĭt, tâm nar 21/9, kruanh n’gâng kan nchră nău đah dak bah dih Chung Eui yong lĕ tâm nchră đah nuĭh tâm ban nău kan Ấn Độ, Subrahmanyam Jaishankar. Bar ding tâm nchră mpeh nău tâm boh bar ding n’hanh ăp nău êng ndrel mât uănh. Nău mbơh ndơ̆ mbơh lôch rơh rƀŭn nchră an saơ,kruanh n’gâng kan nchră nău đah dak bah dih nkah mbơh nău tâm boh bar ding Hàn Quốc-Ấn Độ ăp nar lơ ma ueh knơm ta nău tâm rnglăp n’hanh tâm knơm ndrel đah nuĭh leo kan gâl têh bar dak. Nkre lah tâm ban ŭch tâm kơl tay pah kan ndrel gay ma njêng nău dơi rgum nsum đah nău kơl mpŏng tât mpeh ba dâng mhe bâh Hàn Quốc n’hanh nău kơl mpŏng tât mpeh luh nar bâh Ấn Độ. Bar ding lĕ ŭch ntrôl nthoi tay ăp rơh tâm nchră gâl têh, geh nđâp ăp rơh tâm nchră gâl groi kruanh n’gâng kan “2+2” bâh n’gâng kan nchră nău đah dak bah dih n’hanh n’gâng kan mât rnă njrăng ngih dak.

Nuĭh rblang: Thị Đoắt