VOV4.M’nông – Ôi 18/5, ta Ngih Quốc hội, Kruanh Quốc hội Vương Đình Huệ Kruanh Hội đồng săch ngih dak ƀư tơm Rƀŭn nchră trực tuyến lam dak ƀư n’gul gâl trong kan săch nuĭh ntoh măt Quốc hội khoá 15 n’hanh nuĭh ntoh măt HĐND ăp gưl năm kan 2021-2026. Ntoh ngơi ta rƀŭn nchră, Kruanh Quốc hội Vương Đình Huệ, Kruanh Hội đồng săch ngih dak, an gĭt tât aƀaơ, du đêt nău kan nchrăp an săch lĕ jêh, nchrăp an săch tâm nar 23/5 êp tât. Hội đồng săch Ngih dak lĕ ntrŭnh ƀư Rƀŭn nchră trực tuyến lam dak gay ŭch kơp uănh tay lĕ rngôch trong kan nchrăp an tât aƀaơ, ơm djăt n’hanh mkra ăp nău wăk kol, jêr jŏt, ăp dăn đă, bah ăp ntŭk, ăp rmôt kan ngih pah kan gay tâm ban ŭch gĭt wât, nsrôih n’hao ƀư gay nchrăp uĕh ngăn, tŏng ăp ngăn an rơh săch-du nău khlay chính trị têh bah neh dak dơi ƀư di tĭng trong nchrăp, ngăn ngên lah Nar rgum lam dak, Nar rgum bah nuĭh ƀon n’hanh ngăn ngên lôch uĕh./.

            Nŭih rblang: Y Sưng Phê Ja