VOV4.M’nông: Lŏ rơh hăn khâl ndrel pah kan tâm ăp n’gor Tây Nguyên, lơ 1/7, Kruanh Quốc hội Vương Đình Huệ hŏ pah kan đah rđau kan n’gor Dak Nông. Ntoh nau ta nar pah kan, Kruanh Quốc hội Vương Đình Huệ rnê prêh n’gor Dak Nông ƀư dơi nau săch kan ntoh măt Quốc hội ndrel HĐND ăp gưl, jêh Đại hội Đảng, n’gor ƀư nâp nau rmôt cán bộ ăp gưl tă bah n’gor, nkuăl tât xã, ntrŭnh bôk nau ƀư nau kan tĭng nau ntrŭnh Đại hội Đảng lam dak tal XIII ndrel Nau ntrŭnh Đại hội Đảng bộ n’gor tal XII rjăp.

6 khay bôk năm aơ, nau kan văng sa, rêh jêng bah n’gor geh ueh, lŏ hun hao 6,03% aơ lah nau kan geh kơp dơn, rđi nau geh nsum bah lam dak, tơm prăk soay geh 58%. Kruanh Quốc hội Vương Đình Huệ lah rjăp, tâm nau nkân njrăng ueh srê, ntrŭt dăng nau ntuh kơl, ndâk njêng bôk nau kan tuch tăm, hun hao ăp ntil ndơ geh ơm.

Ngoai tâm ăp nau kan ntoh mô ueh bah Dak Nông tâm rơh rlau aơ, nê lah nau kan ntrơn ƀon lan dah rŏng, Kruanh Quốc hội Vương Đình Huệ lah rjăp, n’gor ân ndâk nau kan jêng du nkô̆ nau tơm, rklaih lĕ tâm 2 nau rnôk hăn ndrel rnôk tât.

Kŏ tâm kêng măng 1/7, Kruanh Quốc hội Vương Đình Huệ ndrel rmôt kan hŏ tât khâl ndrel pă nklâm ndơ ân cán bộ, tahen Công an n’gor Dak Nông. Nau kan aơ hŏ lôch rơh hăn kan bah Kruanh Quốc hội Vương Đình Huệ ndrel rmôt kan tâm ăp n’gor ta Tây Nguyên./.

Nŭih rblang: H’Thi