VOV4.M’nông: Tât khâl n'hanh pă nklâm ndơ an công nhân, nuĭh kan mâp jêr jŏt tă khuch bah nuh srê Covid-19, Kruanh Quốc hội Vương Đình Huệ rnê âk nău nsrôih bah mpôl ăp gưl ta n'gor Dak Lak bol ma jêr jŏt, yơn hŏ ƀư uĕh âk nău kan kơl lam rêh jêng kon nuĭh, mât chăm an đoàn viên công đoàn mô dơn tâm n'gor ma hôm rgop kơl, rgŏ jă nuĭh kan n'gor Bắc Giang, Bắc Ninh… Aơ lah ăp nău kan ngăn ngăn, tŏng ăp nău tâm rŏng, mpơl nău kơl kon nuĭh jru hvi n'hanh njêng nău ring lam dăng, rgop ƀư an nuih n'hâm gơih nđơr đoàn viên n'hanh nuĭh kan, lơn lah ăp nuĭh geh nău rêh jêr jŏt nsing nơm rlău dơi jêr jŏt, gơih nđơr pah kan.

Kruanh Quốc hội Vương Đình Huệ rnê ăp gưl đoàn n'gor Dak Lak n'hanh nău tâm pă, tâm rgop bah ăp nhih pah kan, đơn vị, mpôl doanh nghiệp. Nkhêp geh rnôk dja, Kruanh Quốc hội Vương Đình Huệ, Tổng Thư ký Quốc hội, Chủ nhiệm Văn phòng Quốc hội Bùi Văn Cường n'hanh ăp mpôl hăn pah kan hŏ pă an 50 nklâm ndơ pă an ăp công nhân, nuĭh kan mâp jêr jŏt tă khuch bah nuh srê Covid - 19.

Nuĭh rblang: Điểu Thân