VOV4.M'nông: Kêng măng 8/6, ta Jay Quốc hội, Kruanh Quốc hội Vương Đình Huệ hŏ kuăl điện đah wa Valentina Matvienko, Kruanh Hội đồng Liên bang Nga. Kruanh Quốc hội Vương Đình Huệ n'hanh Kruanh Hội đồng Liên bang Nga Valentina Matvienko an lah da dê, tâm bah ri aơ nơh, tâm boh chính trị đah bar dak mô rlu hun hao uĕh lăng kalơ ăp trong kan Đảng, Ngih dak tâm ban kơt đah ăp n'gor, ăp doanh nghiệp n'hanh mpôl kan lam rêh jêng kon nuĭh bar dak.

Bar kruanh rđău kan ndrel lah rjăp, bol ma tâm rnôk nuh srê Covid-19 lơh khuch tât jâng wăng sa ăp dak, yơn tâm boh wăng sa, tăch rgâl, ntuh kơl Việt - Nga geh ăp njuat rgâl uĕh. Nkhêp geh rnôk dja, kruanh Quốc hội Vương Đình Huệ lah uĕh Liên bang Nga hŏ pă an Việt Nam 1.000 dĭng vaccine Sputnik V bah bôk năm aơ n'hanh mhe aơ hŏ ton kơl an lor gay Việt Nam tât dơi 20 rkeh dĭng vaccine Sputnik V; lah rjăp Việt Nam ŭch rŏng tâm boh đah Liên bang Nga tâm trong kan ndơ̆ rgâl công nghệ n'hanh ƀư njêng vaccine njrăng n'gang Covid-19 ta Việt Nam.

Nuĭh rblang: Điểu Thân