VOV4.M'nông: Nkhêp geh nar nai ntĭm nti Việt Nam 20/11, kêng măng ntri (19/11), Kruanh Quốc hội Vương Đình Huệ hŏ râng ntơm lăp năm nti mhe 2021- 2022 n'hanh mâp măt, nkah gĭt ăp nai ntĭm nti ta nhih nti Đại học Y Hà Nội.

Ntơh măt kruanh rđău kan Đảng, Ngih dak Kruanh Quốc hội Vương Đình Huệ mpơl nău nkah gĭt, mpư rnê ăp nău rgop, kơl an rŭ hôch bah rmôt cán bộ, bác sĩ, nuĭh kan dak si, ăp nai ntĭm nti n'hanh sinh viên nhih nti; ăp nuĭh hŏ mô kă rnam klach rvê, an lĕ n'hâm suan n'hanh săk khĭt rêh săk nơm, lăp ntŭk tơm nuh srê, an lĕ n'hâm suan he, mât njrăng n'hâm suan n'hanh nău rêh đăp mpăn bah ƀon lan. Nchroh, nuh srê COVID-19 hôm tât krit nji, jêr gĭt năl lor, yơn đah nău nsum suan, du nuih n'hâm bah lam rnoi nuĭh, đah han săk nâp dăng n'hanh nău mĭn rôih dăng n'hanh ăp nău tă ơm gĭt kan khlay bah rmôt nai dak si, nău lăp kan bah lam trong kan chính tri, Kruanh Quốc hội Vương Đình Huệ nsing nơm, neh dak mbra ơm dơi mât kân bah lĕ rngôch nuh srê, mât njrăng n'hâm suan bah ƀon lan, dâk hao tay n'hanh hun hao wăng sa- rêh jêng kon nuĭh./.

Nuĭh rblang: Điểu Thân