VOV4.M'nông: Tĭng ƀư bôk nău kan mâp ƀon lan lôch rơh hop bôk năp, Quốc hội khóa 15, ôi ntri (5/8), Kruanh Quốc hội Vương Đình Huệ n'hanh mpôl đại biểu Quốc hội nkual ƀon têh Hải Phòng hŏ ƀư mâp nuĭh ƀon lan tĭng trong pơk sŏng dăng tât lĕ rngôch ăp quận, nkuâl, thị trấn ta nkual ƀon têh Hải Phòng đah rlău 200 bôk ƀoh n'hanh 5.000 cử tri râng. Tâm ban ŭch n'hanh rnê âk nău mbơh lôch jêh rơh hop, ăp nuĭh ƀon lan mĭn lah, rơh hop bôk năp, Quốc hội khóa 15 hŏ mpơl nău dơi nău mĭn bah Kruanh Hồ Chí Minh lah “Nâp nuih n'hâm, rdâng lơh đah âk nău rgâl”. Quốc hội hŏ dŭt ngăch prăl, rƀah gĭt nău lư neh dak, ngăch rplăch, nău dơn kan rnôk kơi ntop Nghị quyết rơh hop bôk năp đah ăp nkô̆ mô hŏ tă geh bah ntơm, ndơ̆ an Chính phủ, Thủ tướng Chính phủ ăp ntŭk nsing di khlay gay lor nchrăp ngăch ngăr lơn tâm nău rđău đă, ƀĭt juet trong njrăng n'gang nuh srê Covid-19. Ơh nău ôp bah ƀon lan mpeh nău hun hao pâl nđaih n'hanh hun hao wăng sa dak lêng Bạch Long Vĩ n'hanh Cát Bà, Kruanh Quốc hội Vương Đình Huệ mĭn lah, nău dja geh nkô̆ dŭt khlay tât njrăng n'gang neh dak, rnă njrăng, jêng nkre đah hun hao wăng sa dak lêng đah njrăng n'gang neh dak, mât njrăng mpô mpa bri, n'hâm sial, rnoh khlay bri dak trôk nar mpêt khlay đêt geh./.

Nuĭh rblang: Điểu Thân