VOV4.M'nông: Tâm bôk nău pah kan ta rơh hop tâl bar, Quốc hội khoá XV, ôi 12/11, Thủ tướng Chính phủ Phạm Minh Chính hŏ geh 90 mnĭt ơh nău ôp bah ăp đại biểu Quốc hội. Aơ lah lor bôk năp Thủ tướng ơh nău ôp kơp ntơm bah rnôk dơn nău kan. Ta rơh ôp ntơh măt Chính phủ, Thủ tướng Chính phủ Phạm Minh Chính lah uĕh ăp đại biểu Quốc hội, ƀon lan, cử tri lam dak hŏ du nuih n'hâm n'hanh uănh khlay, rgop âk nău jru hvi, dơn kan mpeh ăp nău mbơh bah Chính phủ, lơn lah lôch jêh geh tĭng ƀư trong nchrăp hun hao wăng sa- rêh jêng kon nuĭh năm 2021, trong nchrăp hun hao wăng sa rêh jêng kon nuĭh năm 2022 n'hanh tâm pă, tâm yô̆ nđach jru hvi n'hanh tâm ban ŭch kơl pah kan njrăng, n'gang nuh srê Covid-19. Thủ tướng Chính phủ Phạm Minh Chính hŏ mbơh, rblang du đêt nkô̆ nău dơi đại biểu Quốc hội n'hanh ƀon lan, cử tri uănh khlay, kơt pah kan njrăng, n'gang nuh srê, lơn lah rgâl mhe mpeh nău mĭn, trong nkra n'hanh trong ƀư njrăng, n'gang nuh srê tĭng trong rƀŏng bên di đăp mpăn, ngăch ngăr, mât kân dơi nuh srê COVID-19; mpeh đăp mpăn lam rêh jêng kon nuĭh; mpeh ăp trong kơl, trong nkra ntop kơl dâk hao tay n'hanh hun hao wăng sa rêh jêng kon nuĭh.

   Dŭt jêh bar nar n'gul ôp n'hanh ơh nău ôp bah ăp nuĭh lăp kan nsum Chính phủ, Kruanh Quốc hội Vương Đình Huệ uănh năl, Quốc hội hŏ pah kan ndăn ngăch, răp jăp dơn kan âk đah nuih n'hâm rgâl mhe; Quốc hội hŏ ƀư lôch jêh rơh ôp n'hanh ơh nău ôp lor bôk năp bah năm kan tâl 15 tâm nău ƀư geh nău tâm ban, sŏng dăng, tâm rgop n'hanh hŏ geh nău dơi uĕh lăng./.

Nuĭh rblang: Điểu Thân