VOV4.M’nông: Ôi 29/7, ta Nhih pah kan Kruanh dak, Kruanh dak Nguyễn Xuân Phúc wơt wa Lloyd Austin Bộ trưởng Quốc phòng Hợp chủng quốc Hoa Kỳ dôl geh hăn khâl ngăn Việt Nam tĭng nău jă bah Đại tướng Phan Văn Giang, Bộ trưởng Bộ Quốc phòng. Ntơh măt ngih dak n'hanh ƀon lan Việt Nam, Kruanh dak Nguyễn Xuân Phúc lah uĕh Hoa Kỳ hŏ ntop kơl Việt Nam rnoh vaccine njrăng n'gang COVID-19; rnê âk nău dơi tâm nchră đah Bộ trưởng Lloyd Austin n'hanh Bộ trưởng Quốc phòng Việt Nam Phan Văn Giang; bar ding hŏ tâm ban ŭch geh âk nkô̆ nău têh khlay tâm let năp tay. Bộ trưởng Lloyd Austin lah rjăp Hoa Kỳ mbra ntrôl dăng lơn đŏng tâm boh đah Việt Nam ƀư bah khuch khat tâm lơh tâm su an tay bah kơi; lôch nê mô rlu rdâk njêng n'hanh nsing nơm tay nuih n'hâm ƀon lan đah bar dak.

Wơt Bộ trưởng Quốc phòng Hoa Kỳ Lloyd Austin, Thủ tướng Chính phủ rhơn rnê hăn khâl Việt Nam bah Bộ trưởng Quốc phòng Hoa Kỳ, ŭch rŏng ntrŭt ntrôl tâm boh tâm brê lam lĕ rngôch đah Hoa Kỳ nsing kalơ bar ding ndrel nsĭt geh, yor ma nău đăp mpăn, bah tâm lơh tâm su, đăp mpăn n'hanh hun hao tâm nkual n'hanh lam ntŭr neh. Thủ tướng lah rjăp tâm boh wăng sa đah bar dak hôm âk trong lhoi gay hun hao, dăn đă bar ding tâm boh lhăt lơn đŏng tâm  let năp tay, lơn lah ntrŭt ntrôl ăp trong kan ma Hoa Kỳ săk geh âk n'hanh Việt Nam geh dơi kơt ndơ dŏng, ntung trong, tơm nuĭh kan, ŭnh nar sĭt jêng tay....

Nuĭh rblang: Điểu Thân