VOV4.M’nông: Nkuâl Đăk Tô ân rđău đă ăp mpôl kan chính trị, nsum mpôl lăp kan tâm pah kan nkoch trêng, rgŏ jă ƀon lan njrăng, n'gang nuh srê. Aơ lah nău rđău đă bah Groi kruanh UBND n'gor Kon Tum Y Ngọc lôch rnôk hăn ôp uănh pah kan njrăng, n'gang nuh srê ta nuĭh ta nkuâl Đăk Tô lah ntŭk geh nuĭh ji luh mham rih dŭt âk n'gor đah 22 nuĭh ji tâm lĕ rngôch rnoh 33 nuĭh năl geh ji tâm lam n'gor ntơm bah bôk năm tât aƀaơ. Kruanh rđău kan UBND nkuâl Đăk Tô an gĭt tay, rlău ma 22 nuĭh ji luh mham rih, ta nkuâl dja hŏ năl geh 69 nuĭh ji rtoh luh đŏng. Aƀaơ, nkuâl Đăk Tô hŏ n'hanh dôl ntrôl dăng an ƀư ăp nău kan njrăng, n'gang nuh srê lah nsum, ji luh mham rih n'hanh ji jâng ti mbung lah êng. Êng đah pah kan njrăng, n'gang nuh srê Covid-19, ăp xã, thị trấn ta nkuâl Đăk Tô hŏ njêng ăp rmôt hăn pah kan ôp uănh, groi nđôi, rđău đă pah kan njrăng, n'gang nuh srê ta ăp ntŭk tât duh hô, ăp ntŭk geh ma nău ntoh luh nuh srê./. 

Nuĭh rblang: Điểu Thân