VOV4.Mnông – Jêh nar an rlu âk nău ƀư gay njrăng n’gang Covid-19, UBND n’gor Lâm Đồng an sam ƀŭt an du đêt nău ƀư plơ̆ tay kơp bah 2 mông kêng măng 27/5. Tĭng nĕ, du đêt nău ƀư kơt kreh sŏk, ƀư uĕh, ntŭk ngêt sa trong me n’hanh ăp môn thể thao, câu lạc bộ thể thao pah kan plơ̆ tay bah 2 mông nar 27/5. Tâm rnôk nĕ, ăp nău ƀư quán bar, Karaoke, vũ trường, nău pâl điện tử, chợ măng, massage, ntŭk pơk phim, ăp bôk nău mprơ n’hanh ăp nău ƀư pâl rlưn rgum ta ăp quảng trường, kơh n’glău, công viên, ăp nău tâm rlong thể thao hôm e đă rlu nău ƀư an tât rnôk geh nău mbơh mhe. Aƀaơ Lâm Đồng dôl ƀư nkhah êng 209 nuĭh hăn bah nkual srê, tâm nĕ geh 10 nuĭh nkhah êng ta ngih dak si, 127 nuĭh nkhah êng rgum n’hanh 72 nuĭh nkhah êng ta jay. Ôi 27/5, geh tay 52 nuĭh uănh năl mham an saơ mô ntưp đah Covid-19.

Nuĭh rblang: Y Sưng Phê Ja