VOV4.Mnông – Ôi 17/5, UBND n’gor Lâm Đồng geh sam ƀŭt ŭch an nău ntrŭnh an kon hŏk phổ thông, sinh viên, nuĭh nti ăp ngih sam ƀŭt ta n’gor ƀư tâm rlong rơh 2 tâm 3 nar n’hanh an jêh bah năp nar 21/5 tât.

Lâm Đồng ndăn an kon hŏk tâm rlong rơh 2 tâm 3 nar

Tĭng nkô̆ nău đă bah N’gâng kan ntĭm nti n’gor Lâm Đồng, UBND n’gor Lâm Đồng tâm ban ŭch an kon hŏk, sinh viên, nuĭh nti ăp jrô mô hŏ jêh tâm rlong rơh 2 ƀư tay tâm rlong tâm ăp nar 19, 20 n’hanh 21/5; ăp nuĭh êng rlu tay. Lôch rơh tâm rlong rơh aơ, ăp kon hŏk nuĭh nti, sinh viên ta n’gor rlu nti gay njrăng n’gang srê Covid-19. Đah kon hŏk jrô 12, UBND n’gor đă n’gâng kan ntĭm nti n’gor ntĭm, ƀư ôn tay tâm rlong tốt nghiệp THPT đah trong ƀư trực tuyến. Êng ăp ntŭk jêr jŏt, nkaul rnoi mpôl đêt, mô geh ndơ, kỹ thuật gay ôn tâm rlong trực tuyến ri dơi ƀư ôn rgum yơn an răk rao ngih jrô nti, ndoh ndơ, dŏng nti lor rnôk kon hŏk tât ngih sam ƀŭt. Tâm rnôk ăp kon hŏk tât ngih sam ƀŭt, mô rgum rlău 30 kon hŏk/jrô n’hanh văn bôk pŭt mbung, rao kaman, mbơh nai dak si, mât tâm ƀah, đăp mpăn ăp nău ntrŭnh mpeh njrăng n’gang srê.

Nuĭh rblang: Y Sưng Phê Ja