VOV4.M’nông: Đah nroh dăng n’gâr nklăp 3,2m3 dak, kơl an tŏ ân bơi tât 600 ha tơm tăm, nglau dak Proh tâm xã Proh, nkuăl Đơn Dương, n’gor Lâm Đồng dôl ma dak bah năp neu roh đăp mpăn tâm yan mih dak lip yor geh nau khuch hô.

Nglau dak Proh, xã Pró, nkuăl Đơn Dương, n’gor Lâm Đồng dôl ma djơh khuch hô. Trong hăn hao klơ săk ntŭk bât dak dôl ma chah đang, njêng ăp trong đah têh, yor geh tă bah ndeh rdeng jâk hăn trong nê rdeng choih, lŭ. Ndrel ma nê, nau kan brôi neh, nkhŭt neh ƀư in ngăn nglau dak kŏ geh âk ntŭk, ƀư trong dak nglau geh nau nkri khuch. Ăp nau khuch aơ geh tâm rnôk jŏ jong hôm, yơn n’gâng kan tâm nkuăl e êgh nau kan ngăn gay ma ntrơn rgâl, mô lah knŭng rklaih mhal nklă nklêl dơm.

Wa Đỗ Phú Hoà, cán bộ Trạm mât njrăng- leo dŏng trong hoch dak Đơn Dương, nŭih mât nglau dak Proh ân gĭt, ah saơ nau khuch geh tât nglau dak si rmôt kan kŏ nkah mhal ndrel đă n’gâng kan xã rklaih ƀư. Yơn lah, âk ngăn nau kan geh têk jong, nau rklaih mhal mô nâp ƀư nau kan lơn ma khuch, in ntŭk trong trong dak Proh lơn ma mô dơi njrăng. Wa Đỗ Phú Hoà mbơh, rnôk aơ hŏ geh đê̆ ngăn 35 rnặ in neh tâm ntŭk êp nglau dak aơ:

  ‘Lah nsum tâm nau mât trong, ăp nau kan geh tât ri âk ngăn. Lah geh nau tât ma nơm mô nsôih rklaih mhal ri mra têk jong ndrel nar lơn ma khuch tay. Rnôk aơ, neh ntu lơn ma khlaym ăp nau tih vay geh ơm. Lah mô geh rklaih nsôih ngăn du trong nâp nâl ri mra geh nau mât jêr, jêr tâm nau kan mât n’gâr dak ngăn”.

Ntoh ngăn tâm nau kan rklaih mô nâp, mô rjăp ngăn bah n’gâng kan xãPró lah nau in neh tâm nglau dak Proh geh tâm lơ 11/4/2021. Rnôk saơ wa Nguyễn Xuân Hải gŭ tâm nkuăl têh Thach Mỹ, nkuăl Đơn Dương uh ngăn neh, in ngăn tâm nglau dak, Ntŭk mât njrăng, dŏng nglau dak Đơn Dương hŏ ƀư nau njrăng rdâng, đă UBND xã Pró ƀư nau mhal. Yơn lah, tât rnôk aơ, êng nau đă ndŏ prăk mhal 200 rbăn, ăp nŭih nê ê saơ geh rklaih dơi nau khuch, plŏ tay neh ntu nâm ơm. Nkoch tât nau mbrơi aơ, wa Châu văn Kỳ, Kruanh UBND xã Pró lah rjăp mô geh nau nkŭm kơl, mô lah thơ tha ƀư nau têk jong ôh. Yor păng mhe ndơn kan 2 khay ma aơ ri ma nau kan ê geh gĭt ngăn. Wa mbơh mra ngăch rklaih nau aơ tâm rơh tât:

  ‘Rnơm geh nglau dak ăi mơ geh dak tŏ tă bah ntŭk aơ ân tât xã êng ri ma nơm dŭt rhơn ngăn, yơn nau jêr ngăn lah rnôk aơ mhâm ƀư geh nau saơ ndrel rklaih ân rjăp ta ưbah ơm, yor bu aơ dơi in ri bu êng ŭch in đŏng. Ri ma, nau kan ba kơi ngăn lah, lah păng aơ geh nau tih tay ri mhal ngăn dơm”.

Bah năp nau geh bah nglau dak Pró geh bu in khuch hô, Ntŭk mât njrăng, leo dŏng trong hoch dak Đơn Dương hŏ âk tŏ geh nau đă ăp n’gâng kan kơl rdâng lơi ăp ndeh rdeng jâk hăn rlet tâm nglau. Nkre lah, đă n’gâng kan mhal ân rjăp ăp nau tih tât nglau n’gar dak, in ntrong hăn. Lah mô ri nau kan aơ mra geh plŏ sĭt plŏ hăn âk tŏ, lơh khuch ngăn tât nau rđau dŏng ndrel nau mra lơh khuch tât nglau n’gâr dak tâm rơh tât./.

                                    Nŭih rblang: H’Thi