VOV4.M'nông: Kêng măng 2/8, Tỉnh ủy Lâm Đồng hŏ n'gluh nău ntrŭnh mpeh n'hao dăng pah kan njrăng, n'gang nuh srê Covid-19 ta n'gor. Tâm nê, đă nuĭh ƀon lan mô luh bah dih n'hanh mpăng đêt ndeh rklư rsong hăn bah kơi 9h măng tât 5h ôi, mô kơp ăp nuĭh jăch ndăn kơt ŭnh sa, kơl săm ngăch nuĭh ji n'hanh ăp nuĭh geh nău kan mha êng. Nău ntrŭnh dja ntơm dŏng kơp ntơm bah nar 4/8.

Đah trong rƀŏng lah "Njrăng n'gang lhăt, rdôl lơh ndăn ngăch" gay kân đêt, mô an nuh srê ntưp rêng lam hvi, nău ntrŭnh lah kloh, Ban Thường vụ Tỉnh ủy đă ăp nhih pah kan tâm n'gor ân rgum dŭt âk n'hâm suan, mông nar, an lor tơm nuĭh kan an pah kan njrăng, n'gang nuh srê. Mô kâp nơm tay, dơn êng nău kan n'glĕ nău dơi, ntŭk pah kan, săk nuĭh mât uănh, mô an roh nău dơi mât kân nuh srê. Nău ŭch ndơ̆ luh lah nkre njrăng, n'gang nuh srê geh nău tam, nkre đăp mpăn pah kan jan sa, tăch rgâl gay geh tơm ndơ rnă ntêm lor, njrăng n'gang nuh srê n'hanh rhŏ dŏng ƀon lan./.

Nuĭh rblang: Điểu Thân