VOV4.Mnông- Ƀư tĭng nău kan “Rêh nsum đăp mpăn, mât njrăng nuh srê geh săk rnglăy đah Covid-19”. Tĭng Nghị quyết 128 bâh chính phủ, Lâm Đồng dôl ntrôl dăng nău kan chuh vacxin an nuĭh ƀon lan. Tât aƀaơ, n’gor Lâm Đồng lĕ geh pă an rlău 1.500.000 ding vacxin njrăng, rdâng nuh srê Covid-19. N’gor lĕ ƀư lôch 20 rơh chuh n’hanh dôl geh ƀư tay nău chuh n’gang rơh 21.

Lâm Đồng ntrôl ngăch nău chuh vacxin njrăng Covid-19 an nuĭh ƀon lan

Đah rnoh vacxin aơ, Lâm Đồng geh rnoh chuh vacxin 1 nglai lah 96,2% n’hanh 2 nglai lah 44% an ăp nuĭh tŏng 18 năm deh let lơ. Tĭng nău mbơh bâh n’gâng kan dak si Lâm Đồng, rlău ma ƀon lan rlău 18 năm deh, n’gor lĕ dôl geh nău nchrăp chuh vacxin an oh kon se geh năm deh bâh 12 tât 17 năm deh. Ndrel đah nău ngăch chuh vacxin, ăp ntrong kan êng tâm nău ƀư tĭng ntrong kan “Rêh nsum đăp mpăn, mât njrăng săk rnglăy nuh srê Covid-19” lĕ geh n’gor mât uănh n’hanh ntrôl dăng pah kan tĭng.

Nuĭh rblang: Thị Đoắt