VOV4.M’nông: Nŭih ƀĭt ndeh ntưp srê Covid-19 lah nô N.M.T (33 năm gŭ ta thôn 5, xã Đinh Trang Thượng, nkuăl Di Linh) lah nŭih ji mrô 41.056 ndrel lah nŭih ntưp srê tal 15 bah n’gor Lâm Đồng. Tĭng nau uănh năl, nô T tâm công ty Thiên Anh, Quận 12, nkuăl ƀon têh Hồ Chí Minh. Rnôk 2h lơ 12/7 nô ncho ndeh hon-đa sĭt Di Linh. Rnôk tât ntŭk bu njrăng rdâng srê ta yôk Chuối (tâm nkuăl Đạ Huoai, Lâm Đồng) păng geh mbơh dak si yơn mô mbơh kloh, nkoch lah tă bah nkuăl têh Madaguoi, nkuăl Đạ Huoai sĭt ri bu ân păng rlet ntŭk nê. Lơ 15/7, nô T nchoh ndeh Hon-đa hăn tât ngih dak si Phường B’Lao (nkuăl ƀon têh Bảo Lộc) gay ma uănh năl Covid-19 ngăch, nau geh bah rơh 2 uănh năl ri păng geh ntưp ma srê.

Jêh nê, nô T geh bu xét nghiệm RT-PCR tam ngih dak si Đa khoa II Lâm Đồng ndrel geh năl lah ntưp srê SARS-Cov2. Tĭng wa Nguyễn Đức Thuận, Giám đốc N’gâng kan dak si Lâm Đồng, n’gâng kan dak si ndal tâm rgop ma n’gâng kan ƀư nau joi 5 nŭih F1 ndrel 9 nŭih F2 geh mâp êp ma nĭih ji. Ăp nŭih aơ geh xét nghiệm mô ntưp. Rnôk aơ nau kan hăn joi, nkhah ndrle ma uănh ăp nŭih geh tât nŭih ji aơ dôl geh n’gâng kan n’gor Lâm Đồng ntrŭnh uănh./.

Nŭih rblang: H’Thi